విజయవాడలో ఇంటింటి సర్వే.. సిబ్బందికి తప్పని కష్టాలు

జలుబు, జ్వరం ఉన్నా ప్రజలు చెప్పడం లేదంటూ.. ఇంటింటి సర్వే చేస్తున్న సిబ్బంది ఆరోపిస్తున్నారు. అనారోగ్యం అని తెలిస్తే ఎక్కడ క్వారంటైన్​కు పంపిస్తారో అన్న భయంతోనే ప్రజలు ఈ విధంగా చేస్తున్నట్లు సర్వే చేసిన సిబ్బంది అనుమానం వ్యక్తం చేస్తున్నారు.

విజయవాడ నగరంలో ఇంటింటి సర్వే దాదాపుగా పూర్తయింది. వారం రోజులుగా భారీగా సర్వైలెన్స్‌ బృందాలు ప్రతి ఇంటికీ తిరిగి వివరాలు సేకరించాయి. ఈ వివరాలను క్రోడీకరించే పనిలో సిబ్బంది నిమగ్నమయ్యారు. వీటి ఆధారంగా తదుపరి దశ కార్యక్రమాన్ని ప్రారంభించనున్నారు. ఆరోగ్య పరీక్షలు నిర్వహించటం, అనుమానితులను క్వారంటైన్‌ కేంద్రాలకు తరలించటం వంటి చర్యలు తీసుకోనున్నారు.

సేకరణలో తలెత్తిన ఇబ్బందులు

సమాచార సేకరణలో సిబ్బంది పలు ఇబ్బందులు ఎదుర్కొన్నామని చెప్పారు. చాలా మంది ప్రజలు తమ వాస్తవ ఆరోగ్య పరిస్థితులను వెల్లడించలేదన్నారు. జలుబు, దగ్గు ఉందని చెబితే క్వారంటైన్‌ కేంద్రాలకు తరలిస్తారన్న భయంతో చాలా మంది వాస్తవాలు చెప్పడం లేదన్న అనుమానం వ్యక్తం చేశారు.

నగరంలో దాదాపు 2.5లక్షల కుటుంబాలు ఉన్నాయి. బెజవాడలో కరోనా కేసులు నానాటికీ పెరుగుతున్నాయి. ఈ కారణంగా.. 1,699 సర్వైలెన్స్‌ బృందాలను ఏర్పాటు చేశారు. నగరంలో ఇప్పటికే దాదాపు 60 డివిజన్లను కంటెయిన్‌మెంట్‌ జోన్లుగా అధికారులు ప్రకటించారు. ఐదు ప్రాంతాలను రెడ్‌ జోన్‌లుగా గుర్తించారు. సర్వే దాదాపు పూర్తి అయింది. తర్వాత కరోనా నిర్ధరణ పరీక్షలు చేయనున్నారు. రెడ్‌ జోన్లలో పెద్ద సంఖ్యలో పరీక్షలు చేయడమే కాక మిగిలిన చోట్ల అనుమానితులను పరీక్షించనున్నారు. నగరపాలిక సంస్థ ఆధ్వర్యంలో ఇప్పటికే నిడమానూరు, గూడవల్లిలో రెండు క్వారంటైన్‌ కేంద్రాలను ఏర్పాటు చేశారు.

ఇదీ చూడండి: