'భాజపా అనైతిక రాజకీయ క్రీడ ఆడుతోంది'

దిల్లీ పరిస్థితులపై భాజపా ఆడుతున్నది అనైతిక రాజకీయ క్రీడగా సీపీఐ జాతీయ కార్యదర్శి నారాయణ అభివర్ణించారు. సీపీఐ జాతీయ కార్యవర్గ సభ్యుడైన కన్హయ్య కుమార్​పై కేంద్ర ప్రభుత్వం దేశద్రోహం కింద తప్పుడు కేసు పెట్టిందని మండిపడ్డారు.

దిల్లీ అగ్నిగుండం కావడానికి శాంతిభద్రతల సమస్య కారణం కాదని, ఉద్దేశపూర్వకంగా భాజపా, ఆర్​ఎస్​ఎస్​ కలిసి అల్లర్లు సృష్టించి, అధికారంలోకి రావాలని యత్నిస్తోందని సీపీఐ జాతీయ కార్యదర్శి నారాయణ అన్నారు. అల్లర్లకు కారణమైన ముగ్గురు భాజపా నాయకులపై కేసులు ఎందుకు పెట్టలేదని ప్రశ్నించిన.. దిల్లీ హైకోర్టు న్యాయమూర్తి మురళీధరన్​ని బదిలీ చేయించారని వెల్లడించారు. కన్హయ్యపై ఉన్న కేసులను బయటికితోడి అరెస్టు చేయాలని కుట్రపూరితంగా ఆలోచిస్తున్నారని విమర్శించారు. ప్రజాకోర్టులో తాను నిర్దోషినని కన్హయ్య కుమార్ నిరూపించుకున్నాడని, న్యాయ స్థానాల్లోనూ నిర్దోషిగా నిరూపించుకుంటాడన్న నమ్మకం తమకు ఉందని నారాయణ అభిప్రాయపడ్డారు.

ఇవీ చూడండి...