రాష్ట్రంలో కొవిడ్ పాజిటివిటీ రేటు తగ్గింది: ఏకే సింఘాల్

గత కొద్ది రోజులుగా కర్ఫ్యూ కొనసాగుతున్న నేపథ్యంలో రాష్ట్రవ్యాప్తంగా కరోనా పాజిటివిటీ రేటు తగ్గిందని ఆరోగ్య శాఖ కార్యదర్శి అనిల్ కుమార్ సింఘాల్ తెలిపారు.

రాష్ట్రంలో కరోనా పాజిటివిటీ రేటు తగ్గిందని ఆరోగ్య శాఖ ముఖ్య కార్యదర్శి అనిల్ కుమార్ సింఘాల్ తెలిపారు. గత మూడ్రోజులుగా కరోనా కేసులు తగ్గుతున్నట్లు ఆయన వివరించారు. రూర్కెలా, జామ్‌నగర్‌ నుంచి ఆక్సిజన్​ తెప్పిస్తున్నామని పేర్కొన్నారు. ఆక్సిజన్‌ సరఫరాకు తుపాను వల్ల ఇబ్బంది రాకుండా చర్యలు చేపట్టామని స్పష్టం చేశారు.

రాష్ట్ర వ్యాప్తంగా రేపటి నుంచి మూడు రోజుల పాటు కొవిషీల్డ్ మొదడి డోసు పంపిణీ చేయనున్నట్లు రాష్ట్ర వైద్య ఆరోగ్య శాఖ ముఖ్య కార్యదర్శి అనిల్ కుమార్ సింఘాల్ తెలిపారు. 45 ఏళ్లు నిండి.. ప్రజలతో నిత్యం సంబంధాలు కలిగిన రైల్వే, ఆర్టీసీ, బ్యాంకు ఉద్యోగులతో పాటు జర్నలిస్టులకు మొదటి డోసు వేయాలని అన్ని జిల్లాల కలెక్టర్లను ఆదేశించామన్నారు.

తగ్గుముఖం..

గత మూడు రోజుల నుంచి రాష్ట్రంలో కరోనా కేసుల సంఖ్య తగ్గు ముఖం పడుతున్నాయని, రోజుకు వెయ్యి కేసుల వరకూ తగ్గుతూ వచ్చాయన్నారు. 104 కాల్ సెంటర్​కు సైతం కొవిడ్ బాధితుల నుంచి వస్తున్న ఫోన్ కాల్స్ తగ్గుముఖం పట్టాయన్నారు. రాష్ట్రంలో మహమ్మారి వ్యాప్తి త్వరగా కంట్రోల్​లోకి వచ్చే అవకాశముందన్నారు.

తుఫాన్ నేపథ్యంలో​ ముందు జాగ్రత్తగానే..

రాబోయే రెండ్రోజుల్లో తుఫాన్ వల్ల ఇబ్బందులు ఉండొచ్చునని కేంద్రం హెచ్చరించిన నేపథ్యంలో ఆక్సిజన్ నిల్వలు ముందుస్తుగా సమీకరించుకున్నట్లు సింఘాల్ తెలిపారు. రాష్ట్రంపై తుఫాన్ ప్రభావం ప్రత్యక్షంగా పెద్దగా చూపకపోయినా, ఒడిశా నుంచి వచ్చే ఆక్సిజన్ సరఫరాలో ఇబ్బందులు రావొచ్చునని కేంద్ర కేబినెట్ సెక్రటరీ అప్రమత్తం చేసినట్లు పేర్కొన్నారు. ఫలితంగా ముందు జాగ్రత్తగా ఆక్సిజన్ నిల్వలను వివిధ రాష్ట్రాల నుంచి తెప్పించుకున్నామన్నారు.

జూన్​ 15 తర్వాత సరఫరా..

మరోవైపు రాష్ట్ర వ్యాప్తంగా చేపట్టిన జ్వర పీడుతుల గుర్తింపు సర్వే చురుగ్గా సాగుతోందన్నారు. మహమ్మారి బారిన పడి తల్లిదండ్రులను కోల్పోయిన చిన్నారుల జాబితాలను అన్ని జిల్లాల కలెక్టర్లు సిద్ధం చేస్తున్నారన్నారు. బ్లాక్ ఫంగస్ కేసుల వివరాలనూ సేకరిస్తున్నట్లు స్పష్టం చేశారు. జూన్ నెలకు సంబంధించి కొవిషీల్డ్ 11 లక్షలా 45 వేల 540 డోసులు, కొవాగ్జిన్ 3 లక్షల 40 వేల 680 డోసులు మొత్తం కలిపి 14 లక్షల 86 వేల 220 డోసులు కొనుగోలు చేయనుందన్నారు. ఇందుకు సంబంధించి ఆర్డర్ సోమవారం ఇస్తామని, జూన్ 15 తర్వాత సరఫరా చేస్తామని రెండు కంపెనీలు బదులిచ్చాయన్నారు.

ఔషధ నివేదిక కోసం ఎదురుచూపులు...

కృష్ణపట్నం వద్ద ఆనందయ్య ఔషధ తయారీ విధానాన్ని ఆయూష్ కమిషనర్ స్వయంగా పరిశీలించారని, ఇప్పటికే ఆ మందు వాడిన వారిపై ఎలాంటి ప్రభావం చూపించిందనే విషయంపై వివరాలు సేకరిస్తున్నామన్నారు. రాష్ట్ర ప్రభుత్వం నియమించిన నిపుణుల నివేదిక కోసం ఎదురు చూస్తున్నామన్నారు.

ఇవీ చూడండి: