కౌన్సిలింగ్ కోసం వచ్చిన భార్యాభర్తలు.. కుమారుడి పుట్టినరోజు వేడుకలను కృష్ణా జిల్లా మచిలీపట్నం దిశా పోలీస్ స్టేషన్లో నిర్వహించారు. కుటుంబంలో నెలకొన్న మనస్పర్థల కారణంగా గొడవపడటంతో దిశా మహిళా పోలీస్ స్టేషన్లో వీరిపై కేసు నమోదు అయ్యింది. కౌన్సిలింగ్ నిమిత్తం సోమవారం పోలీస్ స్టేషన్కు వచ్చారు. అయితే నేడు వారి కుమారుడి పుట్టినరోజు కావడంతో తల్లిదండ్రులిద్దరూ ఇంటికి వెళ్లి వేడుకలు జరుపుకుంటామని పోలీసులకు చెప్పారు. ఇందుకు పోలీసులు అంగీకరించలేదు.
దిశా మహిళా పోలీస్ స్టేషన్ డీఎస్పీ రాజీవ్ కుమార్ చొరవ తీసుకుని ఆ బాలుడికి వారి తల్లిదండ్రుల సమక్షంలో కేక్ కట్ చేయించారు. పోలీస్ సిబ్బంది సమక్షంలో పుట్టినరోజు వేడుకలు ఘనంగా జరిపించారు. కుటుంబంలో నెలకొన్న చిన్నచిన్న గొడవలకు పసిపిల్లల మనసుల్లో విషబీజాలు మొలకెత్తనివ్వద్దని, మీ గొడవలు అన్నింటిని మరిచి మీ పిల్లలతో సంతోషంగా గడపాలని సూచించారు.