Usharama College Students launched the NASLV 19 high altitude balloon: 'సాధించాలనే తపన, ఆసక్తి, కృషికి.. 'పట్టుదల' తోడైతే విజయం కచ్చితంగా మన సొంతం అవుతుంది.' అనే మాటను ఉషారామా ఇంజినీరింగ్ కళాశాల విద్యార్థిని, విద్యార్థులు రుజువు చేసి చూపించారు. 25 మంది విద్యార్థులు సంకల్ప బలంతో ఎన్ని అడ్డంకులు ఎదురైనా.. వాటన్నింటినీ అధిగమించి.. అనుకున్న లక్ష్యాన్ని సాధించారు. అంతేకాదు, ఆ విజయాన్ని సాధించిన మొదటి కళాశాలగా రాష్ట్రంలోనే మొదటి స్థానాన్ని కైవసం చేసుకుని.. అందరీ చేత శభాష్ అనిపించుకున్నారు. మరి ఏమిటి ఆ ప్రయోగం..?, దాని పేరు ఏంటి..?, ఆ ప్రయోగం వల్ల ఉపయోగాలు ఏంటి..? అనే వివరాలను తెలుసుకుందామా..
NASLV-19 హై ఆల్టిట్యూడ్ బెలూన్ శాట్ ప్రయోగం విజయవంతం.. కృష్ణా జిల్లా ఉంగుటూరు మండలం తేలప్రోలులోని ఉషారామా ఇంజినీరింగ్ కళాశాల విద్యార్థులు.. ఓ వినూత్న కార్యక్రమానికి శ్రీకారం చుట్టారు. అధునాతన సాంకేతిక పరిజ్ఞానంతో NASLV-19 హై ఆల్టిట్యూడ్ బెలూన్ శాట్ను తయారీ చేసి నింగిలోకి విడుదల చేశారు. ఈ ప్రయోగానికి చెన్నైకు చెందిన స్పేస్ కీప్స్ ఇండియా సహకారం అందించింది. దీంతో కళాశాలలోని అన్ని విభాగాలకు చెందిన విద్యార్ధులు.. ఓ బృందంగా ఏర్పాడి శాటి లైట్‌ను రూపొందించారు. ఈ బెలూన్ శాట్ వాతావరణ పరిస్థితులను తెలుసుకునేందుకు ఎంతో ఉపయోగపడుతుందని విద్యార్ధులు తెలియజేశారు.
బెలూన్ శాట్ ప్రయోగంపై డీఆర్డీవో శాస్త్రవేత్త ప్రశంసలు.. NASLV-19 హై ఆల్టిట్యూడ్ బెలూన్ శాట్ ప్రయోగం విజయవంతం అవ్వడంతో ఉషారామా ఇంజినీరింగ్ కళాశాల విద్యార్థుల సృజనాత్మకత చూస్తే.. తనకు ఎంతో సంతోషంగా ఉందని.. డీఆర్డీవో (DRDO) శాస్త్రవేత్త డాక్టర్ పి. అనిల్ కుమార్ అన్నారు. హీలియం గ్యాస్ నింపిన బెలూన్ సుమారు మూడు గంటల పాటు నింగిలో ఉండేలా విద్యార్థులు రుపొందించారని.. ఆ ఈ బెలూన్ శాట్ సుమారు 25 కిలోమీటర్ల ఎత్తులో వాతావరణ పరిస్థితులను ఎప్పటికప్పుడు తెలుసుకునేందుకు ఉపయోగపడుతుందన్నారు. ఇటువంటి పరికరాలు రైతులకు ఎంతగానో ఉపయోగపడుతాయని అన్నారు. అనంతరం ఇలాంటి గొప్ప ప్రయత్నం చేసి, ఫలితం సాధించిన కళాశాల విద్యార్థులను అభినందించారు.