ఉద్యోగుల హెచ్‌ఆర్‌ఏ, సీసీఏలపై కొత్త జీవోలు జారీ.. శ్లాబుల్లో మార్పులు

హెచ్‌ఆర్‌ఏ, సీసీఏ, పింఛను సంబంధిత అంశాలపై ప్రభుత్వం కొత్త జీవోలను జారీ చేసింది. సచివాలయ ఉద్యోగులు, హెచ్‌వోడీలకు 24 శాతం హెచ్‌ఆర్‌ఏ నిర్ధరించినట్లు పేర్కొంది. 2024 జూన్‌ వరకు హెచ్‌ఆర్‌ఏ అమల్లో ఉంటుందని స్పష్టం చేసింది.

రాష్ట్ర ప్రభుత్వ ఉద్యోగుల ఐక్యవేదికకు.. ప్రభుత్వానికి మధ్య కుదిరిన ఒప్పందం మేరకు ఆదివారం నాలుగు ఉత్తర్వులు వెలువడ్డాయి. ఇందులో అన్నింటికన్నా కీలకమైన ఐఆర్‌ రికవరీ లేకుండా చేసే ఉత్తర్వులు మాత్రం ఇంకా విడుదల కాలేదు. 2019 జులై నుంచి 2020 మార్చి నెలాఖరు వరకు 27% చొప్పున ఇచ్చిన మధ్యంతర భృతిని రికవరీ చేస్తున్నట్లు గతంలో ఉత్తర్వులు ఇచ్చారు. డీఏ బకాయిల నుంచి ఐఆర్‌ మొత్తం రికవరీ ఉండబోదని మంత్రుల కమిటీ మినిట్స్‌లో పేర్కొంది. ఈ ఉత్తర్వులు ఆదివారం రాలేదు. దీనిపై ఆర్థికశాఖ అధికారులను సంప్రదిస్తే ఈ ఉత్తర్వులు భవిష్యత్తులో వస్తాయన్నారు. ఎప్పుడనేది స్పష్టత ఇవ్వలేదు. పీఆర్సీ అమలు నిరంతర ప్రక్రియ అని, వాటికి సంబంధించిన ఉత్తర్వులు నెలల తరబడి వస్తూనే ఉంటాయని తెలిపారు. 2020 ఏప్రిల్‌ నుంచి 2021 డిసెంబరు వరకు స్కేళ్లు లెక్కగట్టి రికవరీ లేనందున సర్దుబాటు ప్రక్రియను మార్చి ఉద్యోగులకు డీఏ బకాయిలు ఎంత మొత్తం రావాలో తేల్చాల్సి ఉంది. ఆ బకాయిలు పదవీవిరమణ తర్వాత ఇస్తామని ప్రభుత్వం ప్రకటించింది. ప్రభుత్వం నుంచి ఉద్యోగికి రావాల్సిన మొత్తం ఎంత? పదవీవిరమణ తర్వాత ఎంత వడ్డీతో ఎంత చెల్లిస్తారో స్పష్టత కావాలని ఉద్యోగులు అంటున్నారు.

1. హెచ్‌ఆర్‌ఏ శ్లాబుల్లో మార్పులు

ఉద్యోగులకు, ఉపాధ్యాయులకు హెచ్‌ఆర్‌ఏ శ్లాబులను మారుస్తూ ఆదివారం ప్రభుత్వం ఉత్తర్వులు ఇచ్చింది. ఈ ఉత్తర్వులు జనవరి 2022 నుంచి అమల్లోకి వస్తాయంది.

*దీనివల్ల జనవరి 17న ఇచ్చిన కొత్త పీఆర్సీ ఉత్తర్వుల ప్రకారం ఎంత కోత పెట్టారో ఆ మొత్తం 1.4.2020 నుంచి 31.12.2021 వరకు వర్తింపజేస్తోంది. ఆ సమయంలో ఆర్థిక ప్రయోజనం లెక్కకట్టేందుకు స్కేళ్లు లెక్కలోకి తీసుకున్న పరిస్థితుల్లో కోత పెట్టిన శ్లాబుల ప్రకారమే వర్తింపజేస్తారు. ఆ 21 నెలలు ఇప్పటికే పాత శ్లాబుల ప్రకారం ఉద్యోగులు డ్రా చేశారు. బకాయిల సర్దుబాటు సమయంలో ఈ మేరకు తాము నష్టపోతున్నట్లేనని, ఆ 21 నెలల నష్టం అలా సశేషంగా ఉందని చెబుతున్నారు.

2. సీసీఏ పాత శ్లాబుల కొనసాగింపు- 2022 జనవరి నుంచి వర్తింపు

2020 ఏప్రిల్‌ నుంచి 2021 డిసెంబర్‌ వరకు సీసీఏ తొలగించినట్లే అవుతుంది. ఇప్పటికే ఆ మొత్తాలు డ్రా చేశారు. ఆర్థిక ప్రయోజనం లెక్కకట్టి బకాయిలు తేల్చే క్రమంలో ఇదంతా సర్దుబాటు చేయాల్సి వస్తుందని, దానివల్ల 21 నెలల ప్రయోజనాన్ని నష్టపోయినట్లేనని పేర్కొంటున్నారు.

3. ఫిట్‌మెంట్‌ 23 శాతానికి తగ్గించారు. ఇప్పటికే 2020 ఏప్రిల్‌ నుంచి 2021 డిసెంబర్‌ వరకు 27% చొప్పున డ్రా చేశారు. 2020 ఏప్రిల్‌ నుంచి కొత్త మూల వేతనంతో కలిపి లెక్కించడం వల్ల, డీఏలు జత చేయడం వల్ల మొత్తం మీద పొందే జీతం పెరిగినా.. బకాయిలు లెక్కకట్టే క్రమంలో ఈ 21 నెలల కాలానికి తగ్గిన ఫిట్‌మెంట్‌ రూపంలో నష్టపోతున్నామని చెబుతున్నారు.

4. అదనపు క్వాంటమ్‌ ఆఫ్‌ పెన్షన్‌ సవరిస్తూ ఇచ్చిన ఉత్తర్వులు మాత్రం 1.4.2020 మానిటరీ ప్రయోజనం లెక్కకట్టే నాటి నుంచి అమల్లోకి వస్తాయి.

*1.4.2020 నుంచి 31.12.2021 వరకు 70-79 ఏళ్ల మధ్య వయసు ఉన్న పింఛనుదారులు 3% మేర అదనపు క్వాంటమ్‌ పింఛను రూపంలో పొందే మొత్తాన్ని నష్టపోతూనే ఉన్నారు. వీరికి కూడా 21 నెలల నష్టం కొంత మేర సశేషమే.

మేం పొందేది ఏ మాత్రం

‘ప్రభుత్వం సచివాలయ ఉద్యోగులకు హెచ్‌ఆర్‌ఏ గతంలో 30% ఇచ్చేది.. ప్రభుత్వం దాన్ని 16%కు తగ్గించి, మళ్లీ ఇప్పుడు 24%కు మార్చింది. 8% సాధించేశామని నాయకులు చెబుతున్నారు. నిజానికి ఐఆర్‌ రివకరీని లేకుండా రద్దుచేసి, స్కేళ్లు లెక్క కట్టి, మొత్తం మీద డీఏ బకాయిలు ఏ ఉద్యోగికి ఎంత ఇస్తారో తేల్చాలి. హెచ్‌ఆర్‌ఏ విషయంలో రాబోయే రెండేళ్లలో సచివాలయ ఉద్యోగులు సాధించేది డీఏ బకాయిల రూపంలో అందుకునే మొత్తం కన్నా తక్కువే. ఆ బకాయిలు వడ్డీతో చెల్లించకపోతే కోత పెట్టిన హెచ్‌ఆర్‌ఏలో 8% సర్దుబాటు చేసినందువల్ల మేం పొందేది ఏ మాత్రం’ అని సచివాలయ ఉద్యోగుల సంఘం మాజీ ప్రధాన కార్యదర్శి ఒకరు ప్రశ్నించారు.

21 నెలల నష్టం యథాతథం

ఉద్యోగుల ఐక్యవేదిక నాయకులతో ప్రభుత్వం ఫిబ్రవరి 5న ఒప్పందం కుదుర్చుకుని కొత్తగా పీఆర్సీలో ఏమేం అదనంగా ఇచ్చేదీ తెలిపింది. అయితే అవి ఎప్పటి నుంచి ఇస్తారో వెల్లడించలేదు. ఇందుకు సంబంధించిన స్పష్టత ఆదివారం వచ్చింది. ఈ ఒప్పందాన్ని ఉపాధ్యాయ సంఘ నాయకులు వ్యతిరేకించి పోరాట పంథాలోనే కొనసాగుతున్న విషయం తెలిసిందే.

ఇదీ చదవండి: