ప్రధానమంత్రి గరీబ్‌ కల్యాణ్ యోజన రిలీఫ్‌ ప్యాకేజి-2020 కింద జన్ధన్ ఖాతాల్లో కేంద్రం జమచేసిన రూ.500 కొన్ని బ్యాంకుల ఖాతాల్లో నుంచి తిరిగి వెనక్కిపోతున్నాయి. ఫలితంగా జమ అయిన మొత్తాలను ఇంకా తీసుకోని ఖాతాదారులు తీవ్ర ఆందోళన చెందుతున్నారు.
లాక్డౌన్ కారణంగా పనులు లేక ఇబ్బంది పడుతున్న పేదల కోసం కేంద్రం జన్ధన్ ఖాతాల్లో 3 నెలల పాటు రూ.500 లెక్కన జమచేస్తోంది. ఇప్పటికే దేశవ్యాప్తంగా అన్ని జన్ధన్ ఖాతాల్లో ఈనెల మొదటి వారంలో రూ.500 లెక్కన జమైంది. ఆ డబ్బును డ్రా చేసుకోడానికి బ్యాంకుల వద్ద ఖాతాదారులు బారులు తీరారు.
ఈ నేపథ్యంలో ఖాతాల్లో పడిన మొత్తం తిరిగి వెనక్కి వెళ్లదని ముఖ్యమంత్రి కేసీఆర్‌, మంత్రి ఈటల రాజేందర్లు మీడియా సమావేశాల్లో స్పష్టం చేశారు. ఫలితంగా చాలా మంది ఖాతాదారులు తమ డబ్బులను ఖాతాల్లోనే ఉంచారు.
ఈ క్రమంలో జగిత్యాల జిల్లా మెట్‌పల్లి మండలం బండలింగాపూర్‌కు చెందిన తెలంగాణ గ్రామీణ బ్యాంక్ ఖాతాదారులకు చెందిన కొందరి ఖాతాల్లో నుంచి రూ.500 వెనక్కి వెళ్లాయి. ఫలితంగా ఖాతాదారులు బ్యాంకు అధికారులను నిలదీశారు. తమకేమి సంబంధం లేదని.. అది ప్రధాన కార్యాలయం వారు చూస్తారని తెలిపారు.