నిరసన విరమించిన ప్రభుత్వ విప్ జగ్గిరెడ్డి.. ఇద్దరు పోలీసులపై చర్యలు

PROTEST: 20 గంటలకు పైగా ప్రభుత్వ విప్​ చిర్ల జగ్గిరెడ్డి చేస్తున్న నిరసన విరమించారు. ఏలూరు రేంజ్​ డీఐజీ పాలరాజుతో జరిపిన చర్చలు సఫలం కావడంతో ఈ నిర్ణయం తీసుకున్నారు. అమాయకులైన దళితులపై పోలీసులు.. కేసు నమోదు చేయడాన్ని నిరసిస్తూ జగ్గిరెడ్డి నిన్న సాయంత్రం నుంచి నిరసన చేస్తున్నారు.

PROTEST: ఏలూరు రేంజ్ డీఐజీ పాలరాజుతో ప్రభుత్వ విప్‌ జగ్గిరెడ్డి చర్చలు సఫలమయ్యాయి. దీంతో ఆయన 20 గంటలుగా చేస్తున్న నిరసనను విరమించారు. ఘటనపై విచారణాధికారిగా కోనసీమ జిల్లా అదనపు ఎస్పీని నియమిస్తున్నట్లు డీఐజీ పాలరాజు తెలిపారు. కేసులో కుట్రకోణం ఉందా? లేదా? అనే విషయమై విచారణ జరపనున్నట్లు తెలిపారు. రావులపాలెం సీఐ, ఎస్‌ఐని స్టేషన్ విధుల నుంచి తొలగిస్తున్నామన్నారు.

అమాయకులైన దళితులపై పోలీసులు.. కేసు నమోదు చేయడాన్ని నిరసిస్తూ ప్రభుత్వ విప్ చిర్ల జగ్గిరెడ్డి రావులపాలెం పోలీస్​స్టేషన్​లో నిరసన చేపట్టారు. అమాయకులపై కేసులు నమోదు చేసిన పోలీసులపై చర్యలు తీసుకోవాలని కోరుతూ ఆదివారం మధ్యాహ్నం పోలీస్​స్టేషన్​లో నిరసన చేపట్టారు. అమలాపురం ఎంపీ చింతా అనురాధ.. రావులపాలెం పోలీస్​స్టేషన్ చేరుకుని జగ్గిరెడ్డికి మద్దతు తెలిపారు. ఈ విషయంపై పోలీసు ఉన్నతాధికారులు జగ్గిరెడ్డితో చర్చలు జరుపుతున్నట్ల సమాచారం.

అసలేం జరిగిందంటే:ఈ నెల 5వ తేదీ రాత్రి కోనసీమ జిల్లా రావులపాలెం మండలంలోని గోపాలపురంలో జాతీయ రహదారి పక్కన ఒక హోటల్లో పలువురు యువకులు నూడుల్స్‌, ఫ్రైడ్‌ రైస్‌ పార్సిల్‌ చేయించుకున్నారు. హోటల్‌ సిబ్బంది ఇచ్చిన ప్లేట్లపై అంబేడ్కర్‌ చిత్రాలు ఉండటంతో వారు నిర్వాహకుడిని అడిగారు. దీనిపై ఇరువర్గాల ఫిర్యాదుల మేరకు పోలీసులు రెండు కేసులు నమోదు చేశారు.

హోటల్‌ నిర్వాహకుడు, ప్లేట్లు విక్రయించిన వ్యక్తిపై ఎస్సీ, ఎస్టీ అట్రాసిటీ కేసు నమోదు చేయగా, హోటల్‌ యజమానిని నిలదీసేందుకు వెళ్లిన యువకులు, వాట్సప్‌లో రెచ్చగొట్టేలా సందేశాలు పంపిన 18 మంది దళిత యువకులపై కేసు నమోదుచేసి రిమాండుకు పంపించారు. అప్పటి నుంచి యువకులపై అన్యాయంగా కేసులు నమోదు చేశారని ప్రతిపక్షాలు, దళిత నాయకులు ఆందోళన వ్యక్తం చేశారు. ఎమ్మెల్యే స్వగ్రామం కావడంతో ఆయనే వీరిపై కేసులు నమోదు చేయించారనే ప్రచారం సాగింది. పార్టీ ప్లీనరీలో ఉన్న ఎమ్మెల్యే ఆదివారం మధ్యాహ్నం రావులపాలెం చేరుకుని వైకాపా కార్యాలయంవద్ద సమావేశం నిర్వహించి తప్పుడు కేసులు పెట్టడాన్ని ఖండించారు.

అక్కడ నుంచి దళిత నాయకులు, పార్టీ కార్యకర్తలతో కలిసి పోలీసు స్టేషన్‌ వద్దకు చేరుకుని నిరసన వ్యక్తం చేశారు. సాయంత్రం 4 గంటల నుంచి రాత్రి వరకూ ఆందోళన కొనసాగింది. అమలాపురం డీఎస్పీ మాధవరెడ్డి, సీఐ వెంకట నారాయణ స్టేషన్‌కు చేరుకుని ఎమ్మెల్యేతో చర్చించారు. అక్రమ కేసులు నమోదు చేసిన పోలీసులపై ఏం చర్యలు తీసుకున్నారని, ఎలాంటి విచారణ జరపకుండా అమలాపురం ఘటన తరహా సెక్షన్లతో కేసులు ఎందుకు పెట్టారని డీఎస్పీని జగ్గిరెడ్డి అడిగారు. ఈ రెండు విషయాలు తెలిపేవరకూ స్టేషన్‌ నుంచి వెళ్లనన్నారు. ఇప్పటికీ ఆందోళన కొనసాగుతూనే ఉంది.

ఇవీ చదవండి: