'గడప గడప'కు ప్రశ్నల వర్షం.. సమాధానం చెప్పలేక వైసీపీ నేతల ప‌లాయ‌నం

Gadapa Gadapaki programme: తమ ప్రభుత్వం చేసిన పనులు ప్రజలకు చెప్పేందుకు వైకాపా గడపగడకు కార్యక్రమం నిర్వహిస్తోంది. అయితే పలుచోట్ల ప్రజల నుంచి నిరసనలు వ్యక్తమవుతున్నాయి. తమ సమస్యలపై నాయకులను నిలదీస్తున్నారు. ఉరవకొండలో తమకు లబ్ధి చేకూరని పథకాలను.. లబ్ధి పొందినట్లు కారులో చూపించడంతో నాయకులను ప్రశ్నించారు. అమీనాబాద్​ గ్రామంలో సారా విక్రయాలు కట్టడి చేయకపోతే.. వచ్చే ఎన్నికల్లో ఏ ఒక్కరూ ఓటు వేయరని పిఠాపురం ఎమ్మెల్యేకు ఓ వృద్ధురాలు స్పష్టం చేసింది.

Gadapa Gadapaki Program in AP: అనంతపురం జిల్లా ఉరవకొండ మండలంలో తమకు లబ్ధి చేకూరని అంశాలను సైతం కార్డులో పొందుపరిచారని కూడేరు మండలం గొట్కూరుకు చెందిన ప్రతాప్ నాయుడు పేర్కొన్నారు. గ్రామంలో చేపట్టిన గడపగడపకు మన ప్రభుత్వం కార్యక్రమంలో భాగంగా మాజీ ఎమ్మెల్యే విశ్వేశ్వర రెడ్డి పర్యటిస్తూ ఇంటింటి వద్దకు వెళ్లి.. సంక్షేమ పథకాల లబ్దిని వివరించే ప్రయత్నం చేశారు. కార్డులో పంటప బీమా రూ.3603, మహిళా సంఘాల సున్నా వడ్డీ ద్వారా రూ. 3813 లబ్ధి పొందినట్లు పేర్కొన్నారు. తమకు బీమానే రాలేదని,.. సున్నా వడ్డీ కూడా రూ.600 మాత్రమే వర్తించిందన్నారు. అతని తల్లికి పింఛను రూపంలో రూ.65 వేలు లబ్ధి పొందినట్లు చూపారన్నారు. ఈ ప్రభుత్వం ఏర్పడిన తరువాత పది ఎకరాల భూమి ఉంటే రేషన్ కార్డును రద్దు చేశారని, పింఛను ఐదారు నెలల కూడా ఇవ్వలేదని.. రూ.65 వేలు ఇచ్చినట్లు పొందుపరచటం ఏమిటని మాజీ ఎమ్మెల్యేను నిలదీయగా, వితండవాదం పనికిరాదంటూ ముందుకు సాగిపోయారు.

పిఠాపురం: గడపగడపకు మన ప్రభుత్వం కార్యక్రమంలో పిఠాపురం ఎమ్మెల్యే పెండైం దొరబాబుకి నిరసన తగిలింది. కొత్తపల్లి మండలం అమీనాబాద్ గ్రామంలో నిర్వహించిన గడపగడపకు మన ప్రభుత్వం కార్యక్రమంలో ఏ ఇంటికెళ్లినా మహిళలు సమస్యలతో స్వాగతం పలికారు. రోడ్లు, మురుగు కాలువలు, త్రాగునీరు విద్యుత్ తదితర సమస్యలను విన్నవించారు. గత ప్రభుత్వంలో రోడ్లు కాలువలు, విద్యుత్ సదుపాయాలు కల్పించారు. కనీసం మీ ప్రభుత్వంలో వేసిన కాలువల్లో పూడికైనా తొలగించారా అని మహిళలు ప్రశ్నించారు. ఓ వృద్దురాలు ఎమ్మెల్యే వద్దకు వచ్చి గ్రామంలో విచ్చలవిడిగా సారా విక్రయాలు జరుగుతున్నా ఎవరూ పట్టించుకోవడం లేదని తెలిపారు. పూర్తిస్థాయిలో సారా కట్టడి చేస్తేనే.. వచ్చే ఎన్నికల్లో మీకు ఓటు వేసేదని.. లేదంటే గ్రామంలో ఒక్కరితో కూడా ఓటు వేయించనని చెప్పారు. దీంతో ఎమ్మెల్యే దొరబాబు.. సమస్యలన్నీ పరిష్కరిస్తానని హామీ ఇచ్చారు.

ఇవీ చదవండి: