YCP LEADERS ATTACKS ON SC PEPOLES IN AP : ఓ ఎస్సీ ఎమ్మెల్యేనే ఆంధ్రప్రదేశ్లో అడుగు పెట్టాలంటే భయపడుతోందంటే ఇక్కడి పరిస్థితులు ఎలా ఉన్నాయో.. ఇక్కడ ఆ వర్గాలు ఎలాంటి భయాలు ఎదుర్కొంటున్నారో అర్థం చేసుకోవచ్చు. రాష్ట్రంలో ఎస్సీలపై దమన కొండ హద్దుల్లేకుండా సాగుతోంది. అణచివేత, హత్యలు, నేరాలు, దౌర్జన్యాలు, దాడులు, అక్రమ కేసులు బనాయింపు, వేధింపులు పెద్ద సంఖ్యలో చోటుచేసుకుంటున్నాయి. ఎస్సీలపై కక్ష కట్టారా అన్నట్లు సాగుతున్న ఈ ఘటనల్లో అత్యధిక శాతానికి అధికార వైసీపీ నాయకులే బాధ్యులు. వారే నిందితులు కూడా. అధికార పార్టీ నాయకుల మెప్పు కోసం పోలీసులు సైతం వారికి సహకరిస్తున్నారు. ఇవన్నీ భరించలేక బాధితులు బలవన్మరణాలకు పాల్పడుతున్నారు. తీవ్ర మానసిక క్షోభతో ప్రాణాలు విడుస్తున్నారు.
ఎస్సీ డ్రైవర్ను చంపి.. డోర్ డెలివరీ: వైసీపీ తరఫున ఎన్నికైన ఎమ్మెల్సీ అనంతబాబు.. అతని వద్ద డ్రైవర్‌గా పని చేసే ఎస్సీ యువకుడు సుబ్రమణ్యాన్ని చంపేసి.. ఆ మృతదేహాన్ని దర్జాగా డోర్ డెలివరీ చేశారన్న ఆరోపణలు ఎదుర్కొంటున్నారు. అధికార పార్టీ నాయకుల ఇసుక అక్రమాలపై ప్రశ్నించిన పాపానికి ఎస్సీ యువకుడు ఇండుగుమల్లి వరప్రసాద్‌కు పోలీసు స్టేషన్లో శిరోముండనం చేశారు. కొవిడ్ విజృంభిస్తున్న వేళ మాస్కులు లేకుండా వైద్యం ఎలా చేయాలని అడిగినందకు.. డాక్టర్ సుధాకర్‌ను సస్పెండ్ చేశారు. చొక్కా విప్పి.. చేతులు వెనక్కి విరిచి, తాళ్లతో కట్టి లాఠీలతో కొట్టారు. మానసిక స్థితి బాగోలేదంటూ పిచ్చాసుపత్రిలో చేర్పించారు.
తీవ్ర మానసిక క్షోభకు గురైన ఆయన చివరికి ప్రాణాలొదిలారు. మాస్కు పెట్టుకోకుండా బయట తిరుగుతున్నారంటూ ఎస్సీ యువకుడు కిరణ్ కుమార్‌ను లాఠీలతో చితకబాది అతని మరణానికి కారణమయ్యారు. వైసీపీ ప్రభుత్వ తప్పిదాల్ని ప్రశ్నించినందుకు మాజీ న్యాయాధికారి రామకృష్ణపై చిత్తూరు జిల్లాకు చెందిన ఎస్సీ అక్రమ కేసులు బనాయించి తీవ్రంగా హింసించారు. అదే జిల్లాలో ఎస్సీ వైద్యురాలు అనితారాణిని వేధించి, అసభ్యపదజాలంతో దూషించారు. వైసీపీ ప్రభుత్వ హయాంలో రాష్ట్రంలో ఎస్సీలపై సాగుతున్న దమనకాండకు ఇవి కేవలం కొన్ని ఉదాహరణలు మాత్రమే.
పోలీసుల అండతో ఎస్సీలపై చిత్రహింసలు: కొంతమంది అధికార పార్టీ నాయకులు పోలీసులను అడ్డుపెట్టుకుని ఎస్సీలను చిత్రహింసలకు గురిచేస్తున్నారు. వారిపై అక్రమ కేసులు బనాయిస్తున్నారు. వైసీపీ నాయకుల పైరవీలతో పోస్టింగులు దక్కించుకుని.. కీలకమైన స్థానాల్లో కొనసాగుతున్న కొందరు పోలీసు అధికారులూ ఎస్సీలపై ఆరాచకాలకు తెగబడుతున్నారు. ఆ అవమాన భారాన్ని భరించలేక పలువురు ఎస్సీలు ఆత్మహత్యలు చేసుకుంటున్నారు. పశ్చిమ గోదావరి జిల్లా ఆకివీడు పంచాయతీ ఉపాధ్యక్షుడు పుప్పాల సత్యనారాయణ, ఆయన సోదరుడు గంగాధర్, ఎస్సై కిరణ్‌కుమార్‌ వేధింపులు భరించలేకపోతున్నానంటూ ఎస్సీ ఆక్వారైతు బూరగ నాగేశ్వరరావు లేఖ రాసి గత సంవత్సరం అక్టోబర్‌లో ఆత్మహత్య చేసుకున్నాడు.
- నాగేశ్వరరావు వద్ద పని చేసే సురేశ్‌.. పక్షులను బెదరగొట్టేందుకు నాటు తుపాకీ పేల్చుతూ గాయపడ్డాడు. అతనికి 10 లక్షలు చెల్లించాలంటూ సత్యనారాయణ, గంగాధర్ బెదిరింపులకు పాల్పడ్డారు. పోలీస్స్టేషన్‌కు పిలిపించి కొట్టారని కేసు నమోదైంది. పోలీసులు అక్రమ కేసులు పెట్టి వేధిస్తున్నారంటూ కాకినాడ జిల్లా సామర్లకోటకు చెందిన ఎస్సీ యువకుడు అలపు గిరీష్‌బాబు ఆత్మహత్య చేసుకున్నాడు. మున్సిపల్ ఎన్నికల్లో గిరీష్ అన్నయ్య ప్రవీణ్ కుమార్ స్వతంత్ర అభ్యర్థిగా పోటీ చేశారు. దీంతో ఓ వైసీపీ నాయకుడు ఆ కుటుంబాన్ని లక్ష్యంగా చేసి ఓ కేసు పెట్టించారు. అధికార పార్టీ నాయకుల ఒత్తిడితో పోలీసులు వేధించారు.
- నెల్లూరు జిల్లా కందమూరుకు చెందిన ఎస్సీ యువకుడు ఉదయగిరి నారాయణ గత సంవత్సరం జులైలో అనుమానాస్పద స్థితిలో మృతి చెందారు. ఆయన్ను పోలీసులు చిత్రహింసలు పెట్టారని.. అది బయటపడకుండా ఆత్మహత్యగా చిత్రీకరించారని బాధిత కుటుంబ సభ్యులు ఆరోపిస్తున్నారు. మృతుడి కుల సంప్రదాయాలకు భిన్నంగా పోలీసులు బలవంతంగా అంత్యక్రియలు చేయించారు. నెల్లూరు జిల్లా కావలోలి ఎస్సీ యువకుడు పూడి శ్రీహర్ష ఆత్మహత్యకు యత్నించగా స్థానికులు కాపాడారు. వైసీపీ కావలి ఎమ్మెల్యే రామిరెడ్డి ప్రతాప్‌కుమార్‌రెడ్డి తన రేషన్‌ దుకాణాన్ని తొలగించారని.. కాళ్లుపట్టుకుని వేడుకున్నా కనికరించలేదని.. తన చావుకు ఎమ్మెల్యే, పోలీసులే కారణమంటూ ఆత్మహత్యాయత్నానికి ప్రయత్నించాడు.
- కావలికే చెందిన ఎస్సీ యువకుడు దుగ్గిరాల కరుణాకర్‌ 2022 ఆగస్టులో ఆత్మహత్య చేసుకున్నాడు. 20 లక్షల అప్పు చేసి చెరువులో చేపలు పెంచితే.. వైసీపీ నాయకుడు, శ్రీశైలం ట్రస్టు బోర్డు సభ్యుడు కేతిరెడ్డి జగదీశ్వర్‌రెడ్డి, ఆయన అనుచరుడు సురేష్ రెడ్డి అడ్డుకుంటున్నారంటూ ఎస్పీకి లేఖ రాసి మరీ తనువు చాలించాడు. తల్లితో కలిసి జగదీశ్వర్ రెడ్డి ఇంటి కెళ్లి ఆయన కాళ్లు పట్టుకున్నా కనికరించలేదని లేఖలో వాపోయాడు.
- శ్రీకాకుళం జిల్లా బూర్జ పోలీసు స్టేషన్లో ఎస్సీ యువకుడు మురపాక మహేష్ అనుమానాస్పదస్థితిలో మృతిచెందాడు. ఇంటిని కూల్చివేశారంటూ అనంతపురం జిల్లా కుందిర్పి మండలం నిజవల్లికి చెందిన హనుమంతరాయుడు, అనితా లక్ష్మీ దంపతులు ఆత్మహత్యకు యత్నించారు. తమ ఆధిపత్యాన్ని ప్రశ్నించినా, అడొస్తున్నారని భావించినా, అక్రమాలపై ఫిర్యాదు చేసినా, ఆహాన్ని దెబ్బతీసినా ఎస్సీలను తీసేస్తున్నారు. ఇలాంటి ఘటనల్లో పోలీసులు కఠినంగా వ్యవహరించట్లేదు. దీంతో కొన్ని రోజులు జైల్లో ఉండి బయటకొచ్చేస్తామని, తాము ఎస్సీలను చంపినా తమను ఎవరూ ఏమీ చేయలేరన్న ధీమాతో అధికార పార్టీ నాయకులు రెచ్చిపోతున్నార
- సీఎం జగన్ సొంత జిల్లాలోనే కడప బహుళార్థ పశువైద్యశాలలో డిప్యూటీ డైరెక్టర్‌గా పనిచేస్తున్న ఎస్సీ అధికారి చిన్న అచ్చెన్నను ఇలాగే చంపేశారు. అచ్చెన్న కనిపించట్లేదంటూ అతని కుటుంబ సభ్యులు ఫిర్యాదు చేసినా పోలీసులు పట్టించుకోలేదు. ఉపాధి హామీ పథకంలో అధికార పార్టీ నాయకులు అక్రమాలకు పాల్పడుతున్నారంటూ అధికారులకు ఫిర్యాదు చేసిన ప్రకాశం జిల్లా C.S.పురం మండలం ఏకునాంపురంకు చెందిన దాసరి వెంకటరమణయ్యను చంపేశారు. గుంటూరు జిల్లా పొన్నూరులో అంజి బర్నబాస్‌ను కొందరు అపహరించి హత్య చేశారు. దీని వెనుక వైసీపీ నాయకుల ప్రమేయం ఉందన్న ఆరోపణలు ఉన్నాయి.
- అనకాపల్లి జిల్లా పీఎల్పురం ఎస్సీ కాలనీకి చెందిన వడ్లమూరి నాగేంద్రను కాళ్లు, చేతులూ కట్టేసి బావిలో పడేసి హత్య చేశారు. కాకినాడ జిల్లా తొండంగి మండలం శృంగవృక్షంలో గ్రామదేవతల జాతర సందర్భంగా చోటుచేసుకున్న గొడవల్లో ఎస్సీలపై మరో వర్గం కర్రలు, రాళ్లతో దాడికి పాల్పడింది. ఈ ఘటనలో నడిపల్లి రాము ప్రాణాలు కోల్పోయాడు. గుంటూరులో టీడీపీ కార్యకర్త పొత్తూరి వెంకట నారాయణపై వైసీపీ కార్యకర్తలు హత్యాయత్నం చేశారు. అనంతపురం జిల్లా తాడిపత్రిలో ఎస్సీ కౌన్సిలర్ మల్లికార్జున ఇంట్లోకి చొరబడి అతని తల్లితోపాటు సోదిరిపైనా దాడి చేశారు. ఈ కేసులో నిందితులను అరెస్ట్‌ చేయకుండా కేవలం నోటీసులిచ్చి వదిలేశారు.
దళిత యువకుడు వీధి సుబ్రమణ్యం హత్య కేసులో నిందితుడైన ఎమ్మెల్సీ అనంతబాబు జైలు నుంచి బెయిలుపై విడుదలయ్యాక వైసీపీ శ్రేణులే భారీ ర్యాలీతో బ్రహ్మరథం పట్టారు. ఎమ్మెల్సీ ఎన్నికల్లో క్రాస్ ఓటింగు పాల్పడ్డారంటూ ఎస్సీ మహిళా ఎమ్మెల్యే ఉండవల్లి శ్రీదేవిని వైసీపీ తాజాగా సస్పెండ్ చేసింది. ఆ వెంటనే వైసీపీ శ్రేణులు ఆమె కార్యాలయంపై దాడికి పాల్పడ్డాయి. సామాజిక మాధ్యమాల్లో ఆమెను, ఆమె కుటుంబసభ్యుల్ని కించపరుస్తూ, అసభ్యకరంగా చిత్రీకరిస్తూ విపరీతంగా ట్రోలింగ్ చేస్తున్నారు. వైసీపీ మద్దతున్న నాయకులు ఎస్సీలపై ఎంతటి నేరానికి పాల్పడినా వారిని ఉపేక్షిస్తున్నారు.