ప్రచారానికే పరితమైన జగనన్న ఆరోగ్య సురక్ష 2.O

YSRCP Government Failed: గుంటూరు జిల్లాలో జగనన్న ఆరోగ్య సురక్ష కేంద్రాలకు స్పందన కరవైంది. పేదలకు కార్పొరేట్, సూపర్‌ స్పెషాలిటీ వైద్య సేవలు అందించటమే లక్ష్యంగా వైఎస్సార్సీపీ ప్రభుత్వం చేపట్టిన రెండో దశ జగనన్న ఆరోగ్య సురక్ష శిబిరాల వైపు వెళ్లేందుకు ప్రజలు ఆసక్తి చూపటంలేదు.

YSRCP Government Failed : గ్రామీణ, పట్టణ పేదలందరికీ కార్పొరేట్, సూపర్ స్పెషాలిటీ వైద్య సేవలు అందించటమే లక్ష్యంగా జగనన్న ఆరోగ్య సురక్ష రెండో దశ కార్యక్రమం చేపట్టినట్లు అధికార పార్టీ నేతలు, అమాత్యులు ఎంతగా హడావుడి చేసినా ప్రజలు ఆ శిబిరాల వైపు వెళ్లేందుకు ఆసక్తి చూపడం లేదు. దీంతో గుంటూరు జిల్లాలోని పలు గ్రామాల్లో జగనన్న ఆరోగ్య సురక్ష (Jagananna Arogya Suraksha) శిబిరాలు జనం లేక వెలవెలబోయాయి. వైద్య, ఆరోగ్య శాఖమంత్రి విడదల రజని (Minister Vidadala Rajani) చినపలకలూరు ప్రభుత్వ పాఠశాలలో ప్రారంభించిన జగనన్న ఆరోగ్య సురక్ష శిబిరానికి స్పందన కరవైంది. ఈ గ్రామంలో 2,400 మంది జనభా ఉండగా మధ్యాహ్నం 2 గంటల వరకు కూడా పట్టుమని 100 మంది కూడా వైద్య పరీక్షలకు రాలేదు.

People Reject Jagananna Arogya Suraksha Scheme :జగనన్న ఆరోగ్య సురక్ష రెండో దశ కార్యక్రమానికి ప్రజల నుంచి అనుకున్నఆదరణ దక్కలేదు. గుంటూరు జిల్లాలో వైద్య, ఆరోగ్య శాఖమంత్రి విడదల రజని ఆరోగ్య శిబిరాన్నిఆర్భాటంగా ప్రారంభించినా అదే పరిస్థితి. గత ఏడాది నవంబర్, డిసెంబర్ నెలల్లోజగనన్న ఆరోగ్య సురక్షమెుదటి దశ కార్యక్రమాన్ని నామమాత్రంగా నిర్వహించి ప్రభుత్వం మమ అనిపించింది. ఇప్పుడు రెండో దశ ద్వారా గ్రామీణ, పట్టణ ప్రజల ఆరోగ్య సమస్యలకు వారి ఇంటి ముంగిటిలోనే పరిష్కారాన్ని, వైద్య సేవల్ని అందిస్తున్నట్లు పెద్ద ఎత్తున ప్రచారం చేసుకుంటుంది. కానీ వాస్తవానికి పరిస్థితులు ఇందుకు భిన్నంగా ఉన్నాయి.

గ్రామీణ, పట్టణ ప్రాంతాల్లో రెండు రోజుల పాటు జగనన్న ఆరోగ్య సురక్ష రెండో దశ కార్యక్రమానికి ప్రభుత్వం శ్రీకారం చుట్టగా ప్రజలు ఈ శిబిరాలకు వెళ్లేందుకు పెద్దగా ఆసక్తి చూపలేదు. చినపలకలూరు ప్రభుత్వ పాఠశాలలో వైద్య, ఆరోగ్య శాఖమంత్రి విడదల రజని జగనన్న ఆరోగ్య సురక్ష శిబిరాన్ని ప్రారంభించి అలా వెళ్లగానే ఇలా శిబిరం ఖాళీ అయింది. గ్రామంలో దాదాపు 2400 మంది జనాభా ఉండగా కేవలం 100 కూడా వైద్య పరీక్షల కోసం నమోదు చేసుకోలేదు.

నామమాత్రంగా పరీక్షలు : జగనన్న ఆరోగ్య సురక్ష శిబిరంలో అన్ని విభాగాల వైద్యులు అందుబాటులో ఉంటారని చెప్పినప్పటికీ సాధారణ వైద్యులు, ప్రసూతి, కంటి వైద్యులు మాత్రమే చినపలకలూరు శిబిరంలో పాల్గొన్నారు. కంటి పరీక్షలకు సంబంధించిన ఎలాంటి వైద్య పరికరాలు అందుబాటులో లేకపోవడంతో కేవలం టార్చిలైట్ వేసి వైద్యులు రోగుల్ని నామమాత్రంగా పరీక్షించారు. రక్త పరీక్షలకు సంబంధించి షుగర్, బీపీ లాంటి కొన్నిసాధారణ పరీక్షలు మాత్రమే నిర్వహించారు. వైద్య పరీక్షల అనంతరం మందులు సైతం ఇవ్వకపోవడంతో రోగులు అసంతృప్తి వ్యక్తం చేశారు. ఔషధాలు ఇవ్వనప్పుడు ఇక్కడి వరకూ వచ్చే ప్రయోజనమేంటన్నారు. అన్ని వైద్య సేవలు, పరీక్షలు చేయకపోవడంపై ఒకింత అసహనం వ్యక్తం చేశారు.

ప్రచార ఆర్భాటమే : గుండె, కిడ్నీలు, ఊపిరితిత్తులు తదితర అనారోగ్య సమస్యలను చూసే వైద్యులు కానీ వైద్య సేవలు కానీ అందుబాటులో లేవని, జలుబు, దగ్గు వంటి చిన్నపాటి సమస్యలకు నామమాత్రపు ఆరోగ్య సేవలందిస్తున్నారని ప్రజలు వాపోతున్నారు. అధికార పార్టీకి చెందిన జెండా రంగులతో పోలి ఉండే రంగులు, సీఎం జగన్ చిత్రంతో ఉన్న పెద్ద సంచిలో మందులు ఇస్తూ ప్రచార ఆర్భాటం చేస్తున్నారని గ్రామస్థులు చెబుతున్నారు. శిబిరాల్లో అనేక వ్యాధులకు వైద్య పరీక్షలు చేస్తామని చెబుతున్నా, అందుకు తగిన ఏర్పాట్లు లేవని ఆరోపిస్తున్నారు. కనీసం సూది మందు వేయకుండా పంపించేస్తున్నారని ఆవేదన వ్యక్తం చేస్తున్నారు.