నగరంపాలెం పోలీస్ స్టేషన్ వద్ద పెట్రోల్ డబ్బాతో యువకుడు కలకలం
గుంటూరు నగరంపాలెం పోలీస్ స్టేషన్ ఎదుట ఓ యువకుడు పెట్రోల్ డబ్బాతో కలకలం సృష్టించాడు. అత్తారింట్లో తన చెల్లెలకు సంబంధించిన వివాదాన్ని పోలీసులు పరిష్కరించాలని కోరాడు. లేకుంటే పెట్రోల్ పోసుకుని ఆత్మహత్య చేసుకుంటానని యువకుడు ఆందోళనకు దిగాడు. పోలీసులు అతని వద్ద ఉన్న పెట్రోల్ డబ్బాను బలవంతంగా లాక్కున్నారు. అదే సమయంలో యువకుడి చెల్లెలి అత్త, ఆమె తరపు బంధువులు పోలీస్ స్టేషన్ వద్దకు చేరుకోగా.. పోలీసు సిబ్బంది ఇర్గువర్గాలకు సర్దిచెప్పారు. యువకుడి చెల్లెలు నాలుగేళ్లుగా తన భర్తతో విడిపోయి కన్నవారింటి వద్ద ఉంటోంది. ఇటీవల ఆమె భర్త మృతి చెందినా తమకు సమాచారం లేదని... చివరికి పెద్ద కర్మ రోజు తనను అనుమతించడం లేదని యువతి వాపోయింది. ఇది రెండు కుటుంబాల సమస్య కావటంతో చట్టపరంగా ఉన్న అవకాశాలను పరిశీలించి... వివాద పరిష్కారానికి కృషి చేస్తామని సీఐ చెప్పారు.