Ration smuggling in AP: రాష్ట్రంలో ఇంటింటికీ రేషన్ పేరుతో ఇష్టారాజ్యంగా దోపిడీ జరుగుతోంది. గత నాలుగేళ్లుగా ఏ నెలలోనూ బియ్యం సరిగా అందుతాయనే భరోసా కార్డుదారులకు కరవైంది. కొన్ని గ్రామాలు, పట్టణాల్లో బియ్యం ఎప్పుడు వస్తాయో, ఎప్పుడు పంపిణీ చేస్తారో తెలియని పరిస్థితి నెలకొంది. రేషన్.. బండ్ల ద్వారా పంపిణీ చేస్తారో, డీలర్ల ద్వారా ఇప్పిస్తారో కూడా అంతుపట్టదు. వచ్చినప్పుడు తీసుకోవడమే అన్నట్లుగా తయారైంది. ఎండీయూ ద్వారా బియ్యం వచ్చినా కొన్నిచోట్ల 20 కిలోలకు బదులు.. 10 నుంచి 15 కిలోల చొప్పున ఇస్తున్నారు. మిగిలిన బియ్యం లేవంటున్నారు. మొత్తంగా ఇంటింటికీ రేషన్ పంపిణీ పేరుతో అవకతవకలు మరింత పెచ్చుమీరాయి. అక్రమ రవాణా భారీగా పెరిగింది. అయినా సీఎం జగన్ ముచ్చటపడి ప్రారంభించిన ఇంటింటికి రేషన్ పథకం కావడంతో.. అధికారులూ చూసీచూడనట్లు వదిలేస్తున్నారు. అందులోనూ సీఎంకి సన్నిహితుడైన కాకినాడ జిల్లాకు చెందిన నేత కుటుంబమే చక్రం తిప్పుతుండటంతో ఎక్కడ ఏం జరుగుతున్నా చోద్యం చూస్తున్నారు. అక్రమార్కులు పట్టపగలే కార్డుదారుల నుంచి బియ్యం కొనేసి.. బాహాటంగానే తరలిస్తున్నారు. చౌకబియ్యం అక్రమాల నిగ్గు తేలుస్తామంటూ పౌరసరఫరాలశాఖ.. రైస్‌ ఏజ్‌ టెస్టింగ్‌ యంత్రాలను ఏర్పాటు చేసినా ప్రయోజనం మాత్రం శూన్యం.
కోట్ల రూపాయలు లూటీ.. రాష్ట్రంలో జాతీయ ఆహార భద్రతా పథకం, రాష్ట్ర ప్రభుత్వ కార్డుల కింద ఏటా 25 లక్షల టన్నుల బియ్యం పంపిణీ చేస్తున్నారు. నెలకు 2.31 లక్షల టన్నులు జరుగుతోంది. ఒక్కో కిలో బియ్యంపై రాయితీగా ప్రభుత్వాలు 39 రూపాయల 35 పైసలు చొప్పున ఖర్చు చేస్తున్నాయి. ఏడాదికి 9 వేల 618 కోట్లు ఖర్చు పెడుతున్నాయి. ఇందులో 40 శాతం బియ్యం నల్లబజారుకు తరలుతోంది. కార్డుదారుల నుంచి దాదాపు 40 శాతం అంటే 85 వేల టన్నులు దళారులు కొంటున్నారు. నామమాత్రంగా కిలోకు 12 రూపాయలు చెల్లిస్తున్నారు. ఈ లెక్కన ప్రభుత్వానికి కిలోకు 39 రూపాయల 35 పైసల చొప్పున దాదాపు 4 వేల 13 కోట్లు నష్టం వస్తోంది..
రాష్ట్రమంతటా ఇదే తీరు..
విశాఖ జిల్లాలో.. ఎండీయూ వాహనాల ద్వారా ఇచ్చే బియ్యంలో కోత పెడుతున్నారు. పెందుర్తి మండలం సుజాతనగర్‌ సీ-2 జోన్‌ పార్క్‌ ఏరియాలోని రేషన్ బండి వద్ద అధిక శాతం కార్డుదారులకు.. ఇవ్వాల్సిన బియ్యం కన్నా తక్కువలో తక్కువ 10 కేజీల వరకు కోత విధించారు. వాటికి బదులుగా డిజిటల్‌ పేమెంట్‌గా నగదు చెల్లించారు. కొందరు వాచ్‌మెన్లు తమకు బియ్యం కావాలన్నా ఇవ్వలేదు. అగనంపూడి 85వ వార్డు తలారివానిపాలెంలో ఈనెల 9న చాలామందికి కిలోన్నర నుంచి రెండు కేజీల వరకు బియ్యం తగ్గించి ఇచ్చారు. దీనిపై కార్డుదారులు ప్రశ్నించగా.. ఎవరికి చెబుతారో చెప్పుకోండి అని సమాధానం ఇచ్చారు. లబ్ధిదారులు అధికారులకు ఫిర్యాదు చేయడంతో ఎండీయూ నిర్వాహకుణ్ని సస్పెండ్‌ చేశారు.
అనకాపల్లి జిల్లా.. రావికమతం మండలంలోని ఏజెన్సీ ప్రాంతంలో జీసీసీ డిపో సేల్స్‌మన్, ఎండీయూ ఆపరేటర్‌ కలిసి.. 3.65 టన్నుల బియ్యం, 305 కిలోల పంచదార, 339 కేజీల కందిపప్పును పక్కదారి పట్టించారు. గ్రామాలకు వస్తే సిగ్నల్‌ సరిగ్గా ఉండదంటూ గిరిజనులను నమ్మించి ముందే వేలిముద్రలు తీసుకున్నారు. ఈ వ్యవహారం వెలుగులోకి రావడంతో సేల్స్‌మెన్‌ను సస్పెండ్‌ చేసిన అధికారులు.. ఎండీయూ ఆపరేటర్‌పై ఎలాంటి చర్యలు తీసుకోలేదు. రాష్ట్రవ్యాప్తంగా ఇలాంటి సంఘటనలు ఎన్నో వెలుగుచూస్తున్నాయి.
ప్రకాశం జిల్లాలో.. అధికార పార్టీ నేతలే అక్రమ బియ్యం వ్యాపారానికి సూత్రధారులు. మద్దిపాడు మండలం గుండ్లాపల్లి గ్రోత్‌సెంటర్‌ కేంద్రంగా ఇదంతా జరుగుతోంది. పెళ్లూరులో ఒక మిల్లు నిర్వాహకుడు, వైసీపీ నాయకుడు కలిసి భారీ ఎత్తున చౌకబియ్యాన్ని తరలిస్తున్నారు. గ్రోత్‌ సెంటర్‌లో మూతపడిన మరో మిల్లులో రహస్యంగా చౌక బియ్యాన్ని రీసైక్లింగ్‌ చేసి, తెల్లసంచుల్లో నింపి బహిరంగ మార్కెట్‌లో సన్న బియ్యం పేరుతో విక్రయిస్తున్నారు. బాపట్ల జిల్లాలోని చీరాల, అద్దంకి ప్రాంతాలతో పాటు ప్రకాశం జిల్లాలోని నాగులుప్పలపాడు, కొండపి, త్రిపురాంతకం, యర్రగొండపాలెం, మార్కాపురం, కనిగిరి, గిద్దలూరు ప్రాంతాల్లో డీలర్ల నుంచి సేకరించిన బియ్యాన్ని రాత్రి సమయంలో లారీలు, ఆటోల ద్వారా స్థానిక మిల్లులకు తరలిస్తున్నారు. అక్కడ తేలికపాటి పాలిష్‌ చేసి తెల్ల సంచుల్లోకి మారుస్తున్నారు. తర్వాత కాకినాడ, కృష్ణపట్నం పోర్టులకు తరలిస్తున్నారు. నాగులుప్పలపాడు మండలం ఉప్పుగుండూరులోని మిల్లులో ఇటీవల విజిలెన్స్, ఎన్‌ఫోర్స్‌మెంట్‌ అధికారులు మూడుసార్లు తనిఖీలు చేసి, 2వేల బస్తాలకు పైగా అక్రమ నిల్వలు గుర్తించారు. దీన్ని ఒంగోలుకు చెందిన అధికార పార్టీ కార్పొరేటర్‌ భర్త మరికొందరితో కలిసి నిర్వహిస్తున్నారు. రాజకీయ ఒత్తిళ్లు రావడంతో కేవలం వంద బస్తాలే పట్టుకున్నట్లు తేల్చారు.