'అదే వైకాపా పాలనకు చరమగీతం అవుతుంది'

బీసీలపై వైకాపా ప్రభుత్వం కక్ష పూరితంగా వ్యవహరిస్తోందని చంద్రబాబు విమర్శించారు. ఇసుక కొరతతో పనులు కోల్పోయి ఆత్మహత్య చేసుకున్న 60మందిలో 80 శాతం బీసీలే ఉన్నారని చంద్రబాబు ఆవేదన వ్యక్తం చేశారు.

తెలుగుదేశం పార్టీకి బీసీలు వెన్నెముకగా ఉంటారనే అక్కసుతో... వైకాపా ప్రభుత్వం వారిపై కక్ష సాధిస్తోందని చంద్రబాబు మండిపడ్డారు. బీసీలను నిర్లక్ష్యం చేస్తే అదే వైకాపా ప్రభుత్వ పాలనకు చరమగీతం అవుతుందని హెచ్చరించారు. చంద్రబాబు సమక్షంలో బీసీ హక్కుల పోరాట సమితి సభ్యులు తెలుగుదేశం పార్టీలో చేరారు. పోరాట సమితి అధ్యక్షుడు తాడిబోయిన చంద్రశేఖర్ యాదవ్​తో పాటు 13 జిల్లాల సభ్యులు పార్టీ కండువా కప్పుకున్నారు.

ఇసుక కొరత కారణంగా పనులు కోల్పోయి ఆత్మహత్య చేసుకున్న 60మందిలో 80 శాతం బీసీలే ఉన్నారని చంద్రబాబు ఆవేదన వ్యక్తం చేశారు. తెదేపా పాలనలో రూ.43వేల కోట్లు బీసీలకు కేటాయించామని... వారి సంక్షేమానికి పలు పథకాలు ప్రవేశపెట్టామని వివరించారు. ఉపముఖ్యమంత్రి పదవి సహా 8 కీలక మంత్రిత్వ శాఖలు బీసీలకే ఇచ్చామన్నారు.

ఏపీఐఐసీ, తితిదే, ఉన్నత విద్యామండలి ఛైర్మన్లుగా, 9మంది వైస్ ఛాన్స్​లర్లుగా బీసీలను నియమించామని చంద్రబాబు గుర్తుచేశారు. వైకాపా ప్రభుత్వం ఈ పదవులన్నీ అగ్రకులాలవారికే కట్టబెట్టిందని ధ్వజమెత్తారు. బీసీ పోరాట సమితి నాయకులు చంద్రబాబుకు జ్యోతిరావు పూలే ఫైబర్ విగ్రహాన్ని బహూకరించారు.

ఇదీ చదవండి