ప్రభుత్వ ప్రకటనల్లో వైఎస్సార్ ఫొటో ఎందుకు: యనమల

రైతు దినోత్సవం సందర్భంగా తెలుగుదేశం పార్టీ ఎమ్మెల్యేలపై జరిగిన దాడిపై శాసనసభ సమావేశాల్లో హక్కుల ఉల్లంఘన నోటీసులు ఇవ్వనున్నట్లు మాజీమంత్రి, ఎమ్మెల్సీ యనమల రామకృష్ణుడు తెలిపారు. అసెంబ్లీ సమావేశాల్లో తెదేపా అనుసరించాల్సిన వైఖరిపై ముఖ్య నేతలతో చర్చించారు.

ప్రభుత్వ ఖర్చుతో వైఎస్సార్ జయంతి నిర్వహించడాన్ని మాజీమంత్రి యనమల రామకృష్ణుడు తప్పుబట్టారు. రైతు దినోత్సవం అని పేరు పెట్టి... తెదేపా ఎమ్మెల్యేలను అవమానించారని ప్రభుత్వంపై ధ్వజమెత్తారు. ఎమ్మెల్యేలపై దాడి గురించి హక్కుల నోటీసులు ఇస్తామని తెలిపారు. ప్రభుత్వ ప్రకటనల్లో వైఎస్ చిత్రపటం ఉండటంపై ఆక్షేపణ వ్యక్తం చేశారు.

నిబంధనల ప్రకారం ప్రభుత్వ ప్రకటనల్లో ప్రధాని, రాష్ట్రపతి, సుప్రీంకోర్టు ప్రధాన న్యాయమూర్తి, ముఖ్యమంత్రి, మంత్రుల ఫొటోలు మాత్రమే ఉండాలని గుర్తుచేశారు. వైకాపా ప్రభుత్వం ఏర్పడిన 40 రోజుల్లో ఏం చేసిందో చెప్పకుండా... గత ప్రభుత్వంపై బురద జల్లటమే ధ్వేయంగా పనిచేస్తోందని దుయ్యబట్టారు.

జగన్ ప్రభుత్వం విడుదల చేయబోయే శ్వేతపత్రాలు వాస్తవాలతో ఉండాలన్న యనమల... లేకపోతే తాము కౌంటర్ పత్రాలు ఇస్తామన్నారు. తెలంగాణా ప్రాజెక్టులపై గతంలో వ్యతిరేకంగా మాట్లాడిన జగన్... ఇప్పుడు తెరాస నేతలతో ఎలా తిరుగుతున్నారని ప్రశ్నించారు. పింఛన్ రూ.3వేలు ఇస్తామని చెప్పి... రూ.2వేల 250 మాత్రమే ఇస్తున్నారని విమపర్శించారు. ఫలితంగా ప్రతీ లబ్దిదారు ఏడాదికి రూ.18వేలు నష్టపోతున్నారని పేర్కొన్నారు.

ఇదీ చదవండీ...