గుంటూరు జిల్లా చిలకలూరిపేట 27వ వార్డు వాలంటీర్ సోనీ.. ప్రభుత్వ పథకాలు కావాలంటే ఏ పథకానికి ఎంత సమర్పించుకోవాలో తన పరిధిలోని ఒక ఇంటికి వెళ్లి లబ్ధిదారులకు చెబుతున్న వీడియో వైరల్గా మారింది. ఎలాంటి భయం లేకుండా బరితెగింపుగా ప్రభుత్వ పథకాలు రావాలంటే ఎంత ముడుపులు ముట్టజెప్పాలో నిస్సిగ్గుగా వివరించింది. కొత్త పింఛన్ కావాలంటే రూ.3 వేలు, ఇళ్ల స్థలానికి రూ. 5 వేలు, చేయాతకు రూ. 2 వేలు అంటూ ఒక్కొక్క పథకానికి ఒక్కొక్క ధర చెబుతూ లంచం డిమాండ్ చేసింది. ముడుపులు ముందుగా చెల్లిస్తేనే..లబ్ధిదారుల దరఖాస్తును ఆన్లైన్ చేస్తామని వివరించింది.
ప్రభుత్వం ఇసారి కొత్త విధానాన్ని తీసుకొచ్చిందని.., ముందుగా కొంత సొమ్ము చెల్లిస్తేనే ప్రభుత్వ పథకాలు అందుతాయని లబ్ధిదారులకు వివరించింది. ఈ మొత్తం తమ పైఅధికారులకు ఇవ్వాల్సి ఉంటుందని నిర్భయంగా వెల్లడించింది. ప్రభుత్వం పథకాలు కావాలంటే తనకు ఫోన్ చేసి సంప్రదించాలని ముందుగా కొంత సొమ్ము చెల్లిస్తే.. పథకానికి అర్హులుగా ఎంపిక చేస్తామని తెలిపింది. ఎట్టకేలకు వైరల్ వీడియో అధికారుల దృష్టికి చేరటంతో కమిషనర్ సదరు వాలంటీర్ సోనీని విధుల నుంచి తొలగించారు.