Married life tips : పెళ్లి కుదిరాక ఒకరి గురించి మరొకరు మరింత వివరంగా తెలుసుకోవడం వల్ల పెళ్లి తర్వాత దాంపత్య జీవితంలో ఎలాంటి కలతలు రాకుండా ఉంటాయి. కాబట్టి మీరు కూడా మీ భాగస్వామి ఎలాంటి వారు? తన అభిరుచులు, ఇష్టాయిష్టాలు, మిమ్మల్ని పెళ్లి చేసుకోవడం తనకు ఇష్టమేనా?.. మొదలైన వివరాలన్నీ ముందుగానే తనను అడిగి తెలుసుకోవడం, మీ గురించి కూడా మీ కాబోయే భాగస్వామికి చెప్పడం.. మంచిది. ఫలితంగా పెళ్లి తర్వాత భార్యాభర్తల మధ్య ఎలాంటి కీచులాటలకు తావుండదు. అలాగే పెద్దలు కూడా ఒకరి కుటుంబం గురించి మరొకరు పూర్తిగా తెలుసుకోవడం ఉత్తమం.
అదనపు బాధ్యతలు.. పెళ్లికి ముందు వరకు ఎంత స్వేచ్ఛగా జీవితాన్ని గడిపినా.. పెళ్లి తర్వాత మాత్రం కొన్ని అదనపు బాధ్యతల్ని నిర్వర్తించాల్సి ఉంటుంది. ఎలాంటి పనులైనా, బాధ్యతలైనా ఆనందంగా స్వీకరిస్తాం అనే ఆత్మవిశ్వాసం మీలో ఉందో లేదో పెళ్లికి ముందే బేరీజు వేసుకోవడం మంచిది. లేదంటే పెళ్లి తర్వాత దంపతుల మధ్య, ఇరు కుటుంబాల మధ్య లేనిపోని అపార్థాలు, గొడవలు తలెత్తే అవకాశం ఉంటుంది.
అలాగే మీరు పెళ్లి చేసుకుని వెళ్లే ఇంట్లో మీరు ఇప్పటివరకు అనుభవించినట్లుగా అన్ని సౌకర్యాలు ఉండకపోవచ్చు. వాటి విషయంలో కూడా సర్దుకుపోతామనే ధైర్యం, దృఢ సంకల్పం మీలో ఉందో లేదో ముందుగానే ఆలోచించుకోవాలి. కాబోయే జీవిత భాగస్వామికి అన్ని విషయాల్లో తోడూనీడగా నిలుస్తూ కష్టసుఖాల్ని పంచుకునేందుకు కూడా మీరు సిద్ధమో కాదో ఒక్కసారి ఆలోచించుకోవడం ముఖ్యం. ఇలా ముందుగానే మిమ్మల్ని మీరు ప్రశ్నించుకోవడం వల్ల పెళ్లి తర్వాత జీవితంలో ఎలాంటి ఇబ్బందులు రాకుండా ఉండే అవకాశం ఉంటుంది.
ఉమ్మడిగానా? విడిగానా.. ఈ రోజుల్లో ఉమ్మడి కుటుంబాలు చాలా తక్కువనే చెప్పుకోవచ్చు. చాలామంది వివిధ కారణాల రీత్యా పెళ్లి కాగానే కుటుంబం నుంచి బయటికి వచ్చేసి వేరే కాపురం పెడుతుంటారు. అయితే కొంతమంది మాత్రం ఉమ్మడి కుటుంబాలకే ప్రాధాన్యం ఇస్తుంటారు. మీకు ఉమ్మడి కుటుంబంలో ఉండడం ఇష్టం లేకపోతే.. పెళ్లి తర్వాత అది పెద్ద గొడవలకు దారితీసే ప్రమాదం ఉంటుంది. కాబట్టి ఈ విషయంలో కూడా మీరు కాబోయే భాగస్వామి అభిప్రాయం ఎలా ఉందో కనుక్కోవడం మంచిది. ఫలితంగా ఇద్దరి మధ్య.. అలాగే రెండు కుటుంబాల మధ్య ఎలాంటి సమస్యలు రాకుండా జాగ్రత్తపడచ్చు.