కరోనా కాలం..బెల్లం టీతో లాభాల బాట

అసలే కరోనా కాలం. అందరూ ఆరోగ్యానికి అధిక ప్రాధాన్యం ఇస్తున్న రోజులు. బయట ఏమైనా తినాలన్నా.. తాగాలన్నా ఆలోచించే పరిస్థితి. ఇలాంటి పరిస్థితుల్లో తన వ్యాపారానికి ఇబ్బంది రాకుండా.. ప్రజల ఆరోగ్యానికి సమస్య లేకుండా ఆలోచన చేశాడు గుంటూరు జిల్లాలో ఓ టీ షాపు నిర్వాహకుడు. బెల్లం టీ తయారీని ప్రారంభించారు. అందులో అల్లాన్ని జోడించారు. పంచదార కంటే బెల్లం ఆరోగ్యానికి మంచిది కావటం.. అల్లంలో ఆయుర్వేద గుణాలు ఉండటంతో వినియోగదారులను ఇట్టే ఆకర్షించింది.

గుంటూరు జిల్లాలోని ఫిరంగిపురం పట్టణంలో అన్వర్ షరీఫ్ టీ దుకాణం నిర్వహిస్తుంటాడు. అయితే కరోనా కారణంగా వ్యాపారం మునుపటిలా లేదు. ఆరోగ్యానికి ప్రాధాన్యత ఇస్తూ బయట టీ తాగేవారు తగ్గిపోయారు. ప్రజల ఆరోగ్యానికి ఇబ్బంది లేకుండా.. మళ్లీ తన వ్యాపారం పుంజుకోవటం కోసం ఏం చేయాలని ఆలోచించాడు. ఈ క్రమంలో బెల్లం టీ ఆలోచన వచ్చింది. అందులో అల్లాన్ని జోడించటం ద్వారా ఆయుర్వేద గుణాలు వచ్చేలా చర్యలు తీసుకున్నాడు.

గాజు, పింగాణి కప్పుల్లో కాకుండా... మట్టి గ్లాసులో ఇవ్వటం మొదలుపెట్టాడు. బెల్లం మన జీర్ణ వ్యవస్థకు మేలు చేస్తుంది. మట్టిపాత్రల వినియోగం ఆరోగ్యానికి శ్రేయస్కరం. ఇలా మట్టి గ్లాసులో ఇచ్చే బెల్లం టీకి డిమాండ్ ఏర్పడింది. ప్రస్తుతానికి వారంలో రెండు రోజులు మాత్రమే బెల్లం టీ లభిస్తుంది. మంచి ఆదరణ లభిస్తున్న దృష్ట్యా... దీన్నిరోజూ అందుబాటులోకి తెచ్చేందుకు ప్రయత్నిస్తున్నట్లు అన్వర్ షరీఫ్ తెలిపారు.

బెల్లంతో ఇళ్లలోనే కాఫీ, టీ తయారు చేసుకునే అలవాటు గతంలో ఉండేది. అయితే రానురాను దాన్ని పక్కన పెట్టేశాం. ప్రస్తుతం సాధారణ టీ తాగే బదులు బెల్లం టీ తాగేందుకు ప్రజలు మొగ్గు చూపుతున్నారు. ఇది ఆరోగ్యానికి మేలంటున్నారు వినియోగదారులు. ఇప్పుడు బెల్లం టీకి పెరిగిన డిమాండ్ తో మరికొంతమంది టీ వ్యాపారులూ ఈ తరహాలో తయారు చేసేందుకు సిద్ధమయ్యారు.

ఇదీ చదవండి: రాష్ట్రంలో భారీగా పెరిగిన ఇంటర్నెట్‌ వినియోగం