మంగళగిరిలో కాగడాలతో..
గుంటూరు జిల్లా దాచేపల్లి మండలం పెదగార్లపాడు మాజీ సర్పంచ్ పురంశెట్టి అంకులు హత్యను నిరసిస్తూ మంగళగిరిలో తెదేపా నేతలు కాగడాల ప్రదర్శనలు నిర్వహించారు. పార్టీ కార్యాలయం నుంచి అంబేడ్కర్ కూడలి వరకు కాగడాల ర్యాలీ చేశారు. తెదేపా రాష్ట్ర అధికార ప్రతినిధి దివ్యవాణి ఈ ర్యాలీలో పాల్గొన్నారు.
వైకాపా అధికారంలోకి వచ్చిన తర్వాత తెదేపాకి చెందిన 19 మంది కార్యకర్తలు హత్యకు గురయ్యారని.. ఆ కేసుల్లో ఒక్కరిపైన కూడా చర్యలు తీసుకోకపోవడంపై తెదేపా నేతలు ప్రభుత్వాన్ని ప్రశ్నించారు. కాగడాల వలే ప్రతి కార్యకర్త గుండె రగిలిపోతోందని.. ఆ జ్వాలల్లో అధికార పార్టీ నేతలు కాలిపోకుండా చూసుకోవాలని తెదేపా నాయకులు హితవు పలికారు. ముఖ్యమంత్రి జగన్ కులానికొక నాయకుడిని హత్య చేస్తున్నారని వారు ఆరోపించారు.