తీర ప్రాంతంలో 5385 హెక్టార్లలో వేరుసెనగ సాగవుతుంది. హెక్టారుకు 80 క్వింటాళ్ల వరకు దిగుబడి వస్తోంది. గుంటూరు జిల్లాలోని చెరుకుపల్లి, నగరం, నిజాంపట్నం, పిట్టలవానిపాలెం, కర్లపాలెం, బాపట్ల మండలాల్లో ప్రస్తుతం వేరుసెనగ నూర్పిళ్లు ముమ్మరంగా సాగుతున్నాయి. ప్రస్తుతం వ్యాపారులు రైతులకు 36.50 కేజీల బస్తాకు రూ.2200 చెల్లించి కొనుగోలు చేసి చీరాల, వేటపాలెం, చినగంజాం, ఒంగోలులోని మిల్లులకు తరలిస్తున్నారు. వ్యాపారులు మార్కెట్ సెస్ కింద ఒక శాతం, అమ్మకపు పన్ను కింద ఐదు శాతం చెల్లించాలి. మార్కెటింగ్ శాఖ చెక్‌పోస్టులు ఉన్నా గాని, కళ్లు గప్పి దొడ్డిదారిన వేరుసెనగ పంటను వాహనాల్లో ప్రకాశం జిల్లాకు తరలించి పన్ను ఎగ్గొడుతున్నారు. ఒక్క వేరుసెనగ ఒక్కటే కాదు.. ధాన్యం, మొక్కజొన్న, జొన్న, ఇతర పంట ఉత్పత్తులను ఎలాంటి పన్ను చెల్లించకుండా తరలిస్తున్నారు. స్థానికంగా బాపట్ల మార్కెట్యార్డుకు సెస్ కింద ఏటా రూ.3.20 కోట్ల ఆదాయం రావాలి. వాస్తవానికి 40 శాతానికి పైగా వ్యాపారులు పన్ను చెల్లించకుండా పంట ఉత్పత్తులు దారి మళ్లిస్తున్నారు. దీని ద్వారా ఏటా రూ.కోటిన్నర పైగా మార్కెటింగ్ శాఖ, రూ.5 కోట్లకు పైగా వాణిజ్యపన్నులశాఖ ఆదాయాన్ని కోల్పోతున్నాయి. నూరు శాతం పన్ను వసూలు చేస్తే లక్ష్యాన్ని మించి రూ.4.50 కోట్లకు పైగా ఆదాయం స్థానిక మార్కెట్యార్డుకు లభిస్తుంది.
క్వింటా వేరుశనగ ధర రూ.5275
మార్కెట్ సెస్ (ఒక శాతం) రూ.52
అమ్మకపు పన్ను(ఐదు శాతం)రూ.262
అక్రమ రవాణా ఇలా..
పిట్టలవానిపాలెంలో మార్కెటింగ్ శాఖ చెక్‌పోస్టును తప్పించుకుని వేరుశనగ బస్తాలతో ట్రాక్టర్లు, మినీ లారీలు, టాటా ఏస్‌ వాహనాలు బాపట్ల మండలం నందిరాజుతోట వద్ద పడమర పిన్నిబోయినవారిపాలెం వైపు వెళ్తున్నాయి. దీని ద్వారా మార్కెట్యార్డు ఎదురుగా ఉన్న చెక్‌పోస్టు, వెదుళ్లపల్లి చెక్‌పోస్టులో తనిఖీలు తప్పించుకుంటున్నారు. జీఎస్టీ అధికారుల కంటబడకుండా పడమర పిన్నిబోయినవారిపాలెం, గులాంహుస్సేన్‌తోట మీదుగా పట్టణంలోకి ప్రవేశించి విజయలక్ష్మీపురం, పాండురంగాపురం మార్గంలో అడవిపల్లెపాలెం మీదుగా ప్రకాశం జిల్లా ఓడరేవు వద్ద 216 జాతీయ రహదారికి చేరుకుంటున్నాయి. అక్కడి నుంచి వాహనాలు ప్రకాశం జిల్లాలోని మిల్లులకు వెళ్లిపోతున్నాయి. వాహనాలు వెళ్లే మార్గం ఇరుకు రోడ్డు కావడంతో ప్రమాదాలు చోటుచేసుకుని బోల్తా పడుతున్నాయి. గులాంహుస్సేన్‌ తోట సమీపంలో వేరుసెనగ కాయల లోడుతో వెళ్తున్న ట్రాక్టర్‌ ట్రక్కు బోల్తా పడి ఆ మార్గంలో వాహనాల రాకపోకలు గురువారం నిలిచిపోయాయి. ఆరా తీస్తే సరకు అక్రమంగా దొడ్డిదారిన తరలిస్తున్న విషయం బయటపడింది.