వ్యర్థాలతో అందమైన ఆకృతులు తయారు చేస్తున్న విద్యార్థులు
గుంటూరు జిల్లా రేపల్లె మండలం చాట్రగడ్డ గ్రామంలోని వేదాంత నిష్టాశ్రమ ఉన్నత పాఠశాలలో విద్యార్థులు ప్లాస్టిక్ వ్యర్థాలతో అందమైన ఆకృతులు తయారుచేస్తూ అందరినీ అబ్బురపరుస్తున్నారు. బడి అంటే నాలుగు గోడల మధ్య పాఠాలు వల్లించడం కాదు.. విద్యార్థుల భవిష్యత్తుకు బంగారు బాటలు వేసేలా విజ్ఞానాన్ని పెంపొందించడమని ఈ పాఠశాల చాటి చెబుతుంది. విద్యార్థుల్లో దాగి ఉన్న కళా నైపుణ్యాన్ని వెలికి తీసేందుకు పాఠశాల యాజమాన్యం వ్యర్థ పదార్థాలతో అందమైన కళాకృతులు తయారచేసేలా శిక్షణ ఇస్తోంది.
వ్యర్థాలతో అందమైన ఆకృతులు
నిత్య జీవితంలో ఉపయోగించే ఎన్నో వాటిని పనికిరావన్న భావనతో పడేస్తాం. కానీ కళా హృదయంతో చూస్తే వాటికి అందమైన రూపాన్ని ఇవ్వొచ్చని రుజువు చేస్తున్నారు ఇక్కడి విద్యార్థులు. ప్లాస్టిక్ డబ్బాలతో పూల కుండీలు, పాలిథిన్ కవర్లతో రంగు రంగుల పువ్వులను తయారు చేస్తున్నారు.