Protests Against Chandrababu Arrest: బాబును విడుదల చేసే వరకు విరామం లేదంటూ.. రగులుతూనే ఉన్న నిరసన జ్వాలలు

Protests Against Chandrababu Arrest: చంద్రబాబు అరెస్టుకు వ్యతిరేకంగా మొదలైన నిరసన జ్వాలలు రగులుతూనే ఉన్నాయి. బాబుకు వస్తున్న ప్రజాదరణ చూడలేక.. అక్రమంగా అరెస్టు చేశారని.. రాష్ట్రవ్యాప్తంగా అభిమానులు ఆందోళనలతో హోరెత్తించారు. బాబును విడుదల చేసే వరకు నిరసనలకు విరామం లేదంటూ తెగేసి చెబుతున్నారు.

Protests Against Chandrababu Arrest: గుంటూరు జిల్లా పొన్నూరులో టీడీపీ నేత ధూళిపాళ్ల నరేంద్ర ఆధ్వర్యంలో.. సైకిల్ యాత్ర చేపట్టారు. బాపట్ల జిల్లా పర్చూరులోని దీక్షా శిబిరంలో శ్రేణులు మోకాళ్లపై కూర్చుని నిరసన తెలిపారు. పల్నాడు జిల్లా అమరావతిలో నిర్వహిస్తున్న రిలే దీక్షలో టీడీపీ నేత కొమ్మాలపాటి శ్రీధర్ పాల్గొన్నారు. కృష్ణా జిల్లా తోట్లవల్లూరులో.. కృష్ణానదిలో దిగి శ్రేణులు జలదీక్ష చేపట్టారు. గన్నవరంలో ఓ వ్యక్తి.. అరగుండు కొట్టించుకుని.. వినూత్న రీతిలో నిరసన తెలిపారు.

పశ్చిమగోదావరి జిల్లా తణుకులో దీక్షా శిబిరంలో నల్ల బెలూన్లతో నిరసన తెలిపారు. తూర్పు గోదావరి జిల్లా అనపర్తి కెనాల్ రోడ్డులో నిర్వహిస్తున్న రిలే దీక్షలో మాజీ మంత్రి జవహర్‌ పాల్గొన్నారు. కాకినాడలోని శ్రేణులు.. రోడ్డుపై అర్ధనగ్నంగా నడుస్తూ.. చంద్రబాబును వెంటనే విడుదల చేయాలనే నినాదాలతో హోరెత్తించారు. కోనసీమ జిల్లా రావులపాలెంలో భారత రాజ్యాంగాన్ని పట్టుకుని మోకాళ్లపై కూర్చుని ఆందోళన చేశారు. కొత్తపేటలో బార్‌ అసోసియేషన్‌ లాయర్లు, అయ్యప్ప స్వామి మాలధారులు నిరసన తెలిపారు.

అనకాపల్లి జిల్లా నర్సీపట్నంలో మాజీ మంత్రి అయ్యన్నపాత్రుడు సతీమణి ఆధ్వర్యంలో తెలుగు మహిళలు ర్యాలీగా వెళ్లి.. ఆలయంలో పూజలు నిర్వహించారు. చంద్రబాబు అరెస్టుకు నిరసనగా విశాఖలో మహిళలు రోడ్డు ఊడుస్తూ.. సైకో పోవాలి.. సైకిల్‌ రావాలి అనే నినాదాలతో హోరెత్తించారు. పార్వతీపురం మన్యం జిల్లా సీతానగరం మండలం కాసాపేటలో మత్స్యకారులు ప్రభుత్వానికి వ్యతిరేకంగా నినాదాలు చేస్తూ.. నిరసన తెలిపారు. సాలూరు మండలం శివరాంపురంలోని శ్రేణులు చంద్రబాబు అరెస్టుకు నిరసనగా జలదీక్ష చేపట్టారు..

అన్నమయ్య జిల్లా మదనపల్లిలో కళ్లకు గంతలు కట్టుకుని వినూత్న నిరసన తెలిపారు. పులివెందులలో అరగుండుతో నిరసన వ్యక్తం చేస్తున్న గిరిజనులకు మాజీ ఎమ్మెల్సీ బీటెక్‌ రవి సంఘీభావం తెలిపారు. వైఎస్‌ఆర్ జిల్లా మైదుకూరులో శ్రేణులు చెవిలో పువ్వులు పెట్టుకుని నిరసన తెలిపారు. చిత్తూరు జిల్లా పలమనేరులోని శ్రేణులు తలకిందులుగా నిలబడి నిరసన తెలిపారు. చంద్రబాబు అరెస్టుకు వ్యతిరేకంగా నెల్లూరులో వినూత్న నిరనస తెలిపారు. జగన్‌ పాలనలో రాష్ట్రం 25 ఏళ్లు వెనెక్కి వెళ్లిందంటూ.. వెనెక్కి నడుస్తూ ఆందోళన తెలిపారు.

కర్నూలు జిల్లా ఎమ్మిగనూరులో మండుటెండలో రోడ్డుపై కూర్చుని నిరసన తెలిపారు. కర్నూలు జిల్లా ఆదోనిలో గాడిదకు వినతిపత్రం అందజేసి. నిరసన తెలిపారు. కో పోవాలి.. సైకిల్ రావాలి అని ప్రభుత్వానికి వ్యతిరేకంగా నినాదాలు చేశారు. చంద్రబాబును వెంటనే విడుదల చేయాలని డిమాండ్ చేశారు. అనంతపురం జిల్లా ఉరవకొండలో ఈడిగ గౌడ్స్‌ సోదరులు కల్లు కుండలతో నిరసన తెలిపారు. చంద్రబాబు త్వరగా విడుదలవాలని కోరుతూ.. శ్రీ సత్యసాయి జిల్లా మడకశిర మండలం కల్లుమరిలోని శ్రీ వీరకేతమ్మ ఆలయంలో యాగం నిర్వహించారు.