గుంటూరు సమస్యాత్మక ప్రాంతమైన పల్నాడులో ప్రజలు నిర్భయంగా ఓటేశారు. బుధవారం ఉదయం 6.30 గంటలకు భారీఎత్తున పోలింగ్ కేంద్రాలకు చేరుకున్నారు. ఆ తరువాత కొంత సేపటికే ఓటర్లు బారులుదీరి కనిపించారు. అత్యంత సమస్యాత్మక గ్రామాల్లోనూ 85 శాతంపైగా పోలింగ్ నమోదుకావడం చెప్పుకోవాల్సిన విషయం. మొత్తం మీద మూడో విడత పంచాయతీ ఎన్నికలు జరిగిన గురజాల డివిజన్‌లోని గ్రామాల్లో పండగ వాతావరణం కనిపించింది. జిల్లాలో తొలివిడత ఎన్నికలు జరిగిన తెనాలి డివిజన్‌లో 83.04 శాతం, రెండో విడత నరసరావుపేటలో 85.15 శాతం పోలింగ్ నమోదు కాగా, మూడో విడత గురజాల డివిజన్‌లో 84.80 శాతం పోలింగ్ నమోదైంది. ఒక్క ఓటు కూడా విజయావకాశాలపై ప్రభావం చూపుతుండటంతో గ్రామాల్లో 90 ఏళ్లు పైబడిన వృద్ధులను సైతం వాహనాల్లో తీసుకొచ్చి దగ్గరుండి ఓటు వేయించారు. ఓటరు జాబితాను దగ్గర ఉంచుకుని ఓటింగ్‌ వచ్చిన వారి వివరాలు నమోదుచేసుకున్నారు. మధ్యాహ్నం 12 గంటల నుంచి ఓటింగ్‌కు రాని వారి వివరాలు తీసుకుని వారి ఇళ్లకు వెళ్లి కేంద్రానికి తీసుకువచ్చారు. గ్రామాల్లో ఓటుహక్కు ఉన్నప్పటికీ వివిధ వ్యాపారాలు, వృత్తుల రీత్యా వివిధ పట్టణాలు, నగరాల్లో ఉన్నవారు సైతం గ్రామానికి చేరుకొని ఓట్లు వేశారు. పోటీలో ఉన్న అభ్యర్థులు తమకు కచ్చితంగా ఓటు వేస్తారని నమ్మకమున్న ఓటర్లకు రవాణా సౌకర్యాలు ఏర్పాటు చేసి తీసుకొచ్చారు.
నువ్వానేనా అన్నట్లు పోటీ..