Nara Lokesh Meet Amaravati Farmers: 'అమరావతి రైతుల త్యాగం వృథా కాదు.. మరో 9 నెలలు ఓపికపడితే చాలు..: నారా లోకేశ్

Nara Lokesh Meet Amaravati Farmers : అమరావతి రైతులతో టీడీపీ జాతీయ ప్రధాన కార్యదర్శి నారా లోకేశ్ సమావేశమై ముఖాముఖి నిర్వహించారు. గుంటూరు జిల్లా రావెలలో జరిగిన ఈ కార్యక్రమం ద్వారా రైతులు తాము ఎదుర్కొంటున్న సమస్యలు, కష్ట నష్టాలను లోకేశ్ దృష్టికి తీసుకువచ్చారు. మరో 9 నెలలు ఓపిక పడితే అన్ని కష్టాలు తీరుతాయని లోకేశ్ భరోసా కల్పించారు.

Nara Lokesh Meet Amaravati Farmers : అమరావతి రైతుల పోరాటం ఐదుకోట్ల ఆంధ్రుల కోసమే అని టీడీపీ జాతీయ ప్రధాన కార్యదర్శి నారా లోకేశ్ స్పష్టం చేశారు. రాష్ట్రం కోసం ఎంతో విలువైన భూములు త్యాగం చేశారన్న లోకేశ్.. మరో 9 నెలలు ఓపిక పట్టాలని అమరావతి రైతులను ఉద్దేశించి భరోసా కల్పించారు. మనం కోరుకున్న రాష్ట్రం ఇదేనా అని ప్రతిఒక్కరూ ఆలోచించాలని అన్నారు. అమరావతి ఉద్యమం వల్లే తొలిసారి పోలీస్‌ స్టేషన్‌కు వెళ్లానని గుర్తు చేసుకున్నారు. తల్లి, చెల్లిని మోసం చేసిన వ్యక్తి.. మిగతావారికి న్యాయం చేస్తారా? అని ముఖ్యమంత్రి జగన్​ను ఉద్దేశించి విమర్శించారు.యువగళం పాదయాత్ర 183వ రోజు గుంటూరు జిల్లా రావెలలో కొనసాగుతుండగా.. 'అమరావతి ఆక్రందన' పేరుతో రాజధాని రైతులతో నారా లోకేశ్ ముఖాముఖి నిర్వహించారు. తాడికొండ ఎమ్మెల్యే ఉండవల్లి శ్రీదేవి ఈ కార్యక్రమానికి హాజరయ్యారు.

Reserve Zone అమరావతిలో రిజర్వ్ జోన్‌ రద్దు చేయాలని, భూముల క్రయవిక్రయాలు జరిపేందుకు అనేక ఇబ్బందులు ఎదురవుతున్నాయని రైతులు లోకేశ్ దృష్టికి తీసుకువచ్చారు. 41 జీవో రద్దు చేసి అసైన్డ్‌ రైతులను ఇబ్బంది పెట్టారని, అమరావతిలోని అసైన్డ్ రైతులకు కౌలు కూడా రావడం లేదు.. మేం ఎలా బతకాలి.. పిల్లలను ఎలా చదివించుకోవాలని రైతులు వాపోయారు. దీనిపై లోకేశ్ స్పందిస్తూ.. మేం వచ్చిన వెంటనే రిజర్వ్ జోన్ రద్దు చేస్తామని, మళ్లీ జీవో 41 అమలుచేసే బాధ్యత తీసుకుంటామని స్పష్టం చేశారు. 33 వేల ఎకరాలు ఇచ్చిన రైతులు బాధితులుగా మారారని,ప్రజల పక్షాన మాట్లాడిన ఉండవల్లి శ్రీదేవినీ ప్రభుత్వం ఇబ్బందులు పెట్టిందని చెప్పారు. అమరావతిలో ఇన్‌సైడర్ ట్రేడింగ్ అని ఆరోపించారని, వాస్తవానికి అమరావతి మెగా సిటీ అవుతుందని ఆనాడు చంద్రబాబు చెప్పారని గుర్తు చేశారు. అమరావతికి మాస్టర్ ప్లాన్‌ ఇచ్చిన సింగపూర్‌ వాళ్లనూ పంపించేశారని లోకేశ్ పేర్కొన్నారు.

Assembly శాసనసభ వద్దకు వెళ్లామని తమపై కేసులు పెట్టారని రైతులు వాపోయారు. తనపై 31 కేసులు పెట్టి అన్ని స్టేషన్లలో తిప్పారని ఓ రైతు కన్నీటి పర్యంతమయ్యాడు. లాఠీలతో కొట్టారు.. బూటుకాళ్లతో తన్నారు.. పొలాల్లో పనిచేసే కూలీలను పలుచోట్లకు తీసుకెళ్లి ఇబ్బంది పెట్టారు.. పనిచేసుకుని బతకాలా.. వాయిదాలకు తిరగాలా? మేం ఇన్ని కష్టాలు పడుతుంటే నేతలు, అధికారులు ఏమయ్యారని రైతులు ప్రశ్నించారు. అమరావతి రైతులను జైలుపాలు చేయడమే పోలీసుల పనా? మాకు కౌలు డబ్బు కూడా సరిగా వేయడం లేదని లోకేశ్ దృష్టికి తీసుకువచ్చారు. వైసీపీ పాలనలో ఇబ్బందులు ఎదుర్కొంటున్నామన్న రైతులు.. కడుపునిండా తిని, కంటినిండా నిద్రపోయి.. నాలుగేళ్లు అయ్యిందని ఆవేదన వ్యక్తం చేశారు. దుర్గగుడికి వెళ్తున్నా పోలీసులు అడ్డుకుని కొట్టారని, మేం దొంగలమా.. నక్సలైట్లమా..? అని మహిళా రైతులు దుయ్యబట్టారు. రాజధాని కోసం భూములిచ్చి మనోవేదన చెందుతున్నామని, భూములు ఇవ్వడమే మేం చేసిన తప్పా?.. మేం, మా బిడ్డలు చేసిన తప్పు ఏంటి? అని వాపోయారు.

Jai Amaravati అమరావతి ఉద్యమం వల్లే తొలిసారి పోలీస్‌ స్టేషన్‌కు వెళ్లానని గుర్తు చేసుకున్న లోకేశ్.. జై అమరావతి అంటేచాలు.. కొట్టేవారు.. కేసు పెట్టేవారని అన్నారు. అమరావతిలో బాత్‌రూమ్‌లపై డ్రోన్లు ఎగరేశారని, రైతులపై 224 కేసులు పెట్టారని ప్రభుత్వంపై మండిపడ్డారు. ఎంపీలుగా గెలిచినవారే మహిళలను అవమానించడం దారుణమని అన్నారు. ప్రభుత్వానికి వ్యతిరేకంగా మాట్లాడితే పెయిడ్ ఆర్టిస్టులు అంటున్నారన్న లోకేశ్.. అమరావతి రైతులు మరో 9 నెలలు ఓపిక పడితే చాలు.. మా ప్రభుత్వం వచ్చాక వడ్డీతో సహా చెల్లిస్తామని భరోసా కల్పించారు. అమరావతిలో ఆపేసిన పనులన్నీ మళ్లీ ప్రారంభిస్తామని స్పష్టం చేశారు.

Three Capitals అమరావతి రైతులు ఏటా 3 పంటలు పండే భూమిని త్యాగం చేశారు.. 5 కోట్ల ఆంధ్రుల కోసం భూములు అప్పగించారన్న లోకేశ్.. అభివృద్ధి వికేంద్రీకరణను చేసి చూపించిన వ్యక్తి చంద్రబాబు అని తెలిపారు. అనంతపురం, చిత్తూరు, నెల్లూరు, ప్రకాశం జిల్లాలకు పరిశ్రమలు తెచ్చామని, గోదావరి జిల్లాలకు ఆక్వా పరిశ్రమలు, విశాఖ జిల్లాకు అదానీ, ఫ్రాంక్లిన్ టెంపుల్‌టన్‌ పరిశ్రమలు తెచ్చామని చెప్పారు. అమరావతికి ఒక్క ప్రైవేట్ పరిశ్రమను కూడా తీసుకురాలేదన్నారు. ఎన్నికల ముందు అమరావతికి జగన్‌ జైకొట్టారని గుర్తు చేస్తూ.. ఎన్నికల తర్వాత మాట తప్పారు.. మడమ తిప్పారని మండిపడ్డారు. దక్షిణాఫ్రికాను ఉదహరిస్తూ.. ఇక్కడ మూడు ముక్కలాట ఆడుతున్నారని ధ్వజమెత్తారు. అమరావతి రైతులను ఈ ప్రభుత్వం అన్ని రకాలుగా అవమానించిందని చెప్పారు. 3 రాజధానులు అంటున్న జగన్.. ఎక్కడైనా ఒక్క ఇటుక వేశారా..? హైకోర్టును కర్నూలుకు తరలిస్తున్నామని సీజేను ఎప్పుడైనా అడిగారా? అని సూటిగా ప్రశ్నించారు. విశాఖ ప్రజలను కూడా జగన్ మోసం చేస్తున్నారని తెలిపారు. ఏపీ వార్తా పత్రికల్లో హత్యలు, అత్యాచారాలు, కబ్జాలు, దాడుల వార్తలు వస్తుంటే.. తెలంగాణ పేపర్లలో పరిశ్రమలు, పెట్టుబడులు, ఉద్యోగాలు, సంక్షేమ వార్తలు చూస్తున్నామని, ఇక్కడి పరిశ్రమలు కూడా పక్క రాష్ట్రాలకు తరలిపోతున్నాయని పేర్కొన్నారు.

కులం, మతం, ప్రాంతం.. పేరుతో విషం కక్కుతున్నారు.. మనమధ్య చిచ్చు పెట్టి రాజకీయ లబ్ధి పొందాలని చూస్తున్నారు.. మనం కోరుకున్న రాష్ట్రం ఇదేనా అని ప్రతిఒక్కరూ ఆలోచించాలని లోకేశ్ పిలుపునిచ్చారు.