గుంటూరు జిల్లా పెదకాకానికి చెందిన సత్యదేవ్‌ రాజు.. సీఏ పూర్తిచేశారు. కొన్నాళ్లు సివిల్ సర్వీసెస్‌కూ సన్నద్ధమయ్యారు. సొంతంగా ఏదైనా చేయాలనే లక్ష్యంతో సేంద్రియ సాగు చేపట్టి ఆరోగ్యకరమైన చేపలను ప్రజలకు అందుబాటులోకి తీసుకురావాలనుకున్నారు. దీనికి రీసర్క్యులేటరీ ఆక్వాకల్చర్‌ సిస్టమ్‌- ఆర్.ఎ. ఎస్ విధానాన్ని ఎంచుకున్నారు. 7 సెంట్ల స్థలంలో... 6 ట్యాంకులు నిర్మించారు. 15 వేల చేపపిల్లలు వేసి 14 టన్నుల దిగుబడి సాధించే దిశగా బాటలు వేస్తున్నారు. ఇప్పటికే 5.6 టన్నులు విక్రయించగా... మరో 8 టన్నుల చేపలు కొన్ని రోజుల్లో అమ్మకానికి సిద్ధం చేస్తున్నారు. నిరంతర పర్యవేక్షణ, సాంకేతిక పరిజ్ఞానాన్ని ఉపయోగించుకుని ముందుకు సాగుతున్నారు. 5 ఎకరాల విస్తీర్ణంలో పెంచాల్సిన చేపలను కేవలం 7 సెంట్ల స్థలంలోనే పెంచుతున్నారు. చెరువుల్లో సంప్రదాయంగా 15వేల చేపల్ని పెంచేందుకు 5 కోట్ల లీటర్ల నీరు అవసరం కాగా.... కేవలం 1.06 లక్షల లీటర్ల నీటితోనే సాగు చేస్తున్నారు.
7 సెంట్ల విస్తీర్ణంలోని ఆక్వా ఫామ్‌లో.. 5 సెంట్లలో జి. ఐ.., 6 అల్యూమినియం ట్యాంకులు నిర్మించారు. ట్యాంకు మధ్యలో సెంట్రల్‌ డ్రైనేజ్‌ పైపు ఏర్పాటు చేశారు. దీని ద్వారా చేపల మలమూత్రాలు, వ్యర్థాలు డ్రెయిన్‌లోకి వెళ్తాయి. దీనిపై సాగు ఆధారపడి ఉంటుంది. వివిధ దశల్లో.. 80 నిమిషాల్లో.. లక్షా 6 వేల లీటర్ల నీటిని శుభ్రం చేస్తారు. ఈ ప్రక్రియ నిరంతరం జరుగుతూనే ఉంటుంది. దీని వల్ల చేపలు ఆరోగ్యంగా ఉండటంతో పాటు.. పెరుగుదల వేగంగా ఉంటుందని సత్యదేవ్‌ తెలిపారు..
"ఈ ప్రాజెక్టు నిర్మాణానికి 32 లక్షల రూపాయలు పెట్టుబడి ఖర్చయింది. పావు కిలో చేప పిల్లలు తెచ్చి 5 నుంచి 6 నెలలపాటు పెంచితే కిలో నుంచి 1250 గ్రాముల వరకు బరువు పెరుగుతాయి. సగటున 14 టన్నుల వరకు దిగుబడి వస్తుంది. కొర్రమీను, అపోలో చేపల్ని పెంచుతున్నారు. ఆర్గానిక్ పద్ధతిలో పెంచినందున కిలో 250 రూపాయలకు అమ్ముతున్నాను."