Minister KTR Launched Amazon Air in Hyderabad: ప్రముఖ ఇ-కామర్స్‌ దిగ్గజం అమెజాన్ (Amazon) భారత్లో అమెజాన్ ఎయిర్ (Amazon Air) సేవలను ప్రారంభించింది. ఇందులో భాగంగా వస్తువులను త్వరగా డెలివరీ చేయడానికి గానూ కార్గో విమానాలను వినియోగించుకోనుంది. తెలంగాణలోని హైదరాబాద్లో సోమవారం జరిగిన కార్యక్రమంలో తెలంగాణ మంత్రి కేటీఆర్ సమక్షంలో ఈ సేవలను అమెజాన్ ప్రారంభించింది. దీంతో వస్తువులను రవాణా చేయడం ఈ కార్గో సేవల వల్ల సులభతరం అవుతుంది.
అమెజాన్ ఎయిర్ సేవల్లో భాగంగా మంబయి, బెంగళూరు, హైదరాబాద్, దిల్లీ నగరాలకు వస్తువులను త్వరతిగతిన డెలివరీ చేయడానికి గానూ బోయింగ్‌ 737-800 విమానాలను వినియోగించనుంది. ఇందుకోసం బెంగళూరుకు చెందిన క్విక్‌జెట్‌ సంస్థతో అమెజాన్ జట్టుకట్టింది. భారత్లో ఓ ఇ-కామర్స్‌ సంస్థ థర్డ్‌ పార్టీ విమానసేవలను వినియోగించుకోవడం ఇదే తొలిసారి. తొలుత 2016లో అమెరికాలో అమెజాన్ ఎయిర్ సేవలు ప్రారంభమయ్యాయి. తర్వాత యూకేకు విస్తరించారు. అమెరికా, యూకే తర్వాత ఈ సేవలను భారత్లో అందుబాటులోకి తీసుకురావడం గమనార్హం. భారత్లో ఈ సేవలను ప్రైమ్‌ ఎయిర్ పేరిట తీసుకొచ్చారు.