3 రోజులు ముందుకు.. ఒక్క పూటలో మళ్లీ వెనక్కు!

లాక్​డౌన్ తో వేరే ప్రదేశాల్లో ఇరుక్కున్న వలస కూలీలు నడకే శరణ్యంగా భావిస్తున్నారు. గుంటూరు జిల్లాకు వచ్చిన వలస కూలీలు లాక్‌డౌన్‌ నేపథ్యంలో తాడికొండ మండలం రావెలలో ఉండిపోయారు. వీరు సొంతూరు నంద్యాలకు వెళ్లడానికి మూడు రోజులుగా పాదయాత్ర చేస్తున్నారు. గుంటూరు జిల్లా సరిహద్దు నరసరావుపేట మండలంలోని లక్ష్మీపురం చెక్‌పోస్టు వద్దకు చేరుకోగానే అక్కడ ఉన్న ఎస్ఐ వారిపై ఆగ్రహం వ్యక్తం చేశారు. వ్యానులో వెనక్కు పంపారు.

కరోనా నేపథ్యంలో సొంతూళ్లకు చేరడానికి 3 రోజులుగా నడిచి వస్తున్న వలసకూలీలను పోలీసులు అడ్డుకున్నారు. వారిని వెంటనే మినీ వాహనంలో తిరిగి వారు బయలు దేరిన చోటుకు తరలించారు. కూలీ పనుల కోసం గుంటూరు జిల్లాకు వచ్చిన వలసకూలీలు లాక్‌డౌన్‌ నేపథ్యంలో తాడికొండ మండలం రావెలలో ఉండిపోయారు.

వీరు సొంతూరు నంద్యాలకు వెళ్లడానికి తలపై వంట సామగ్రితో మూడురోజుల క్రితం బయల్దేరారు. తిప్పలు పడి బుధవారం గుంటూరు జిల్లా సరిహద్దు నరసరావుపేట మండలంలోని లక్ష్మీపురం చెక్‌పోస్టు వద్దకు చేరుకోగానే అక్కడ విధులు నిర్వహిస్తున్న మహిళా ఎస్సై వారిపై కారాలు మిరియాలు నూరారు.

ఎక్కడి నుంచి వచ్చారో అక్కడికే తిరిగి వెళ్లాలని ఆగ్రహించారు. మూడు రోజుల నుంచి నడిచి వస్తున్నాం. మా ఊరుకు పంపండి అని వేడుకున్నారా కూలీలు. ఊరిలో ఉన్న పిల్లలు ఏడుస్తున్నారు.. తిండిలేక అల్లాడుతున్నారని వాపోయినా వినిపించుకోలేదు. అక్కడ ఉన్న ఓ వాహనంలో తక్షణమే వెనక్కు పంపారు. చివరకు వలస కూలీల నుంచే వాహనానికి డబ్బులు ఇప్పించి ఓ కానిస్టేబుల్‌ను, స్థానిక వైకాపా కార్యకర్తను ఇచ్చి రావెల గ్రామానికి పంపారు. ఎన్నాళ్లీ ఈ కష్టాలు అని వలస కూలీలు ఆవేదన వెలిబుచ్చారు.

ఇదీ చదవండి: