మద్యం ప్రియులకు బిగ్ షాక్ - ఏపీలో మరోసారి భారీగా ధరలు పెంచేందుకు సిద్ధమైన ప్రభుత్వం

Liquor Price Hike in Andhra Pradesh: మద్యం వల్ల కుటుంబాలు ఛిన్నాభిన్నం అవుతున్నాయంటూ.. ఎన్నికల ముందు చెప్పుకొచ్చిన జగన్‌.. సంపూర్ణ మద్యపాన నిషేధం హామీ ఇచ్చి.. మడమ తిప్పేశారు. నాలుగున్నరేళ్ల పాలనలో మద్యాన్నే ప్రధాన ఆదాయ వనరుగా మార్చుకుని.. ప్రజల ప్రాణాలతో చెలగాటమాడుతున్నారు. ఇప్పుడు ఇంకో అడుగు ముందుకేసి.. మద్యంపై మరింత ఆదాయానికి కొత్త ప్రణాళిక వేశారు. బ్రాండ్ల మూలధరపై.. శాతాల రూపంలో ఏఆర్‌ఈటీ విధించారు. ఇందుకు సంబంధించి ఎక్సైజ్‌ శాఖ శుక్రవారం ఉత్తర్వులిచ్చింది..

Liquor Price Hike in Andhra Pradesh: ఎన్నికల ముందు సంపూర్ణ మద్యపాన నిషేధం అన్నారు. ఆ తర్వాత దశలవారీగా మద్యంపై నిషేధమంటూ మాట మార్చారు. తీరా చూస్తే.. నాలుగున్నరేళ్లలో లక్షా పదివేల కోట్ల రూపాయలకు పైగా మద్యాన్ని విక్రయించారు. ఇలా ప్రజల రక్తమాంసాలతో వ్యాపారం చేస్తున్న జగన్‌ సర్కార్‌ వారి నుంచి మరింత ఆదాయం పిండుకోవడానికి కొత్త ఎత్తుగడ వేసింది. ఎంఆర్​పీ (Maximum Retail Price) ఆధారంగా వివిధ బ్రాండ్లపై ఫిక్స్‌డ్‌ కాంపొనెంట్‌ రూపంలో ప్రస్తుతం విధిస్తున్న అదనపు రిటైల్‌ ఎక్సైజ్‌ సుంకాన్ని మూలధరపై శాతాల రూపంలో వసూలు చేయనుంది. తదనుగుణంగా వ్యాట్, ఏఈడీని సవరించింది.

దీంతో అన్ని రకాల మద్యం బ్రాండ్లపై ఒకే తరహాలో పన్నుల భారం పడనుంది. అయితే ఈ సవరణలోనే చిన్న మతలబు ఉంది. కొన్ని బ్రాండ్ల మద్యం ధరలు క్వార్టర్‌ సీసా 10 నుంచి 40 రూపాయల వరకూ, హాఫ్‌ బాటిల్‌ 10 నుంచి 50 రూపాయల వరకూ, ఫుల్‌ బాటిల్‌ 10 నుంచి 90 రూపాయల వరకూ పెరిగాయి. మరికొన్ని బ్రాండ్ల ధరలు తగ్గాయి. ఎక్కువగా అమ్ముడయ్యే బ్రాండ్ల ధరలు పెరగగా.. అధికంగా అమ్ముడుపోని, అందుబాటులో లేని బ్రాండ్ల ధరలు తగ్గాయి. దీంతో ప్రభుత్వానికి ఆదాయం భారీగానే లభించనుంది. కావాల్సినవారికి సంబంధించిన కొన్ని బ్రాండ్ల విక్రయాల పరిమాణం పెంచేందుకు వాటి ధరలు తగ్గించినట్లు తెలుస్తోంది.

ఒక్కో కేసు మూలధర 2 వేల 500 రూపాయల లోపు ఉన్న ఇండియన్‌ మేడ్‌ ఫారిన్‌ లిక్కర్‌ బ్రాండ్ల మూలధరపై 2 వందల 50 శాతం, మూల ధర 2 వేల 500 కంటే ఎక్కువ ఉన్న బ్రాండ్లపై 150 శాతం ఏఆర్‌ఈటీ (Additional Retail Excise Tax) విధించారు. బీరు కేసుపై 225 శాతం ఏఆర్‌ఈటీ విధించారు. వీటన్నింటిపైనా ఏఈడీ, వ్యాట్‌లు చెరో 10 శాతం, స్పెషల్‌ మార్జిన్‌ 110 శాతం చొప్పున వసూలు చేయనున్నారు. ఫారిన్‌ లిక్కర్‌ కేసుపై 75శాతం ఏఆర్‌ఈటీ విధించారు.

విదేశీ మద్యం సరఫరాదారుల నుంచి కొనుగోలు చేసే ధరలను ఆంధ్రప్రదేశ్‌ స్టేట్‌ బెవరేజెస్‌ కార్పొరేషన్‌ లిమిటెడ్‌ పెంచింది. ఇప్పటికే ఏపీఎస్​బీసీఎల్​ (Andhra Pradesh State Beverages Corporation Limited) వద్ద రిజిస్టరై ఉన్న బ్రాండ్లకు ప్రస్తుతం చెల్లిస్తున్న ధరలపై 20శాతం పెంచింది. అంతకంటే తక్కువకు సరఫరాదారులు చెల్లించేందుకు ముందుకొస్తే ఆ ధరనే చెల్లిస్తామని పేర్కొంది.

కొత్తగా నమోదు చేసుకునే బ్రాండ్లకు మాత్రం పొరుగు రాష్ట్రాలు చెల్లిస్తున్న ధరనే ఇస్తామని తెలిపింది. ఈ మేరకు ఎక్సైజ్‌ శాఖ ప్రత్యేక ప్రధాన కార్యదర్శి రజత్‌ భార్గవ ఉత్తర్వులు జారీచేశారు. విదేశీ మద్యం బ్రాండ్ల కొనుగోలు ధరలు పెంచటం వల్ల ఆయా బ్రాండ్ల ఎంఆర్​పీ పెరుగుతుంది. దీనివల్ల సర్కారుకు అదనంగా ఆదాయం రానుంది.