'కియా కార్ల పరిశ్రమ రూపంలో గత ప్రభుత్వం రాష్ట్రానికి మంచి పెట్టుబడే తెచ్చింది. అందుకు ఆ ప్రభుత్వానికి అభినందనలు. నాడు ఆ సంస్థకు ఇచ్చిన హామీలను ఇష్టం ఉన్నా లేకపోయినా మేం అమలు చేయాలి. ఆ కంపెనీ ఇక్కడికి వచ్చినందుకు ప్రస్తుత ప్రభుత్వం వచ్చే 20 ఏళ్ల పాటు రాయితీల రూపంలో పెనాల్టీ చెల్లించాల్సి వస్తోంది...' అని రాష్ట్ర పరిశ్రమలశాఖ మంత్రి మేకపాటి గౌతమ్‌రెడ్డి పేర్కొన్నారు. సోమవారం మంగళగిరిలోని ఏపీఐఐసీ కార్యాలయంలో ఆయన విలేకరులతో మాట్లాడారు.
'కొత్త ఎలక్ట్రానిక్‌ పాలసీలో భాగంగా కడపలోని ఈఎంసీ-3లో మొబైల్‌ ఫోన్ల తయారీ యూనిట్‌ను ఏర్పాటు చేసేందుకు 'యాపిల్‌' సంస్థతో సంప్రదింపులు జరుపుతున్నాం. ఈ యూనిట్‌ ఏర్పాటైతే సుమారు 50 వేల మందికి ఉపాధి లభిస్తుంది. బల్క్‌ డ్రగ్‌ పార్కు కోసం పోటీ పడుతున్న రాష్ట్రాల్లో ఆంధ్రప్రదేశ్ ముందు వరుసలో ఉంది. కరోనా పరిస్థితుల్లోనూ పరిశ్రమలకు రూ.1,100 కోట్ల ప్రోత్సాహక బకాయిలు చెల్లించిన ఘనత మా ప్రభుత్వానికే దక్కుతుంది. గత ప్రభుత్వ హయాంలో చేసిన ఎంవోయూలన్నీ కాగితాల మీదే ఉన్నాయి. 2014-19 మధ్య రాష్ట్రంలో సుమారు రూ.24 లక్షల కోట్ల పెట్టుబడులకు సంబంధించిన ఒప్పందాలు చేశారు. వాస్తవంగా ఆచరణలోకి వచ్చినవి రూ.50 వేల కోట్లు కూడా ఉండవు. ఎవరైతే వెంటనే పరిశ్రమను ప్రారంభించేందుకు సిద్ధంగా ఉన్నారో, వారికే మా ప్రాధాన్యం. ప్రతి నెలా మొదటి సోమవారం నిర్వహించే స్పందన కార్యక్రమంలో ఫిర్యాదులు స్వీకరించేలా ఏర్పాట్లు చేస్తున్నాం..' అని మంత్రి గౌతమ్‌రెడ్డి పేర్కొన్నారు.