Sarpanchs Association meeting: గ్రామపంచాయతీలు, సర్పంచుల పట్ల రాష్ట్ర ప్రభుత్వం వ్యవహరిస్తున్న తీరును.. ఉమ్మడి గుంటూరు జిల్లా సర్పంచుల సంఘం తీవ్రంగా ఖండించింది. గుంటూరులోని కొరటాల భవన్లో జరిగిన సదస్సులో పాల్గొన్న అన్ని పార్టీల సర్పంచులు.. ప్రభుత్వం తమను ఉత్సవ విగ్రహాలుగా మార్చేసిందని ఆగ్రహం వ్యక్తంచేశారు. విధులు, నిధులు లాగేసుకుని.. వాలంటీర్లు, గృహసారథులు, సచివాలయ కన్వీనర్లతో పాలన సాగిస్తోందని ధ్వజమెత్తారు. రాష్ట్ర ప్రభుత్వం నుంచి రావాల్సిన నిధులు ఇవ్వకపోగా... కేంద్ర నిధులను కూడా లాగేసుకోవడం దారుణమని మండిపడ్డారు. ప్రభుత్వ తీరుతో గ్రామాల్లో ఏ పనీ చేయలేకపోతున్నామని.. కనీసంగా మురుగుకాలవల్లో పూడిక తీయించలేని దుస్థితికి చేరామని సర్పంచులు ఆవేదన వ్యక్తంచేశారు. పథకాల లబ్ధిదారుల ఎంపికలో వాలంటీర్లదే పెత్తనమని... ఈ విషయంలో ఎమ్మెల్యేల మాట వినే పరిస్థితి కూడా లేదని గుర్తుచేశారు. ఏదో చేస్తారనే నమ్మకంతో జగన్‌ను గెలిపిస్తే.. నిలువునా ముంచేశారని వైసీపీకి చెందిన ఓ సర్పంచ్ చెప్పుతో కొట్టుకుని పశ్చాత్తాపడ్డారు.
ఆర్థిక సంఘం నిధులను రాష్ట్ర ప్రభుత్వం దొంగిలించింది..పంచాయతీ సర్పంచులకు సమాంతరంగా ప్రభుత్వం తెచ్చిన సచివాలయ కన్వీనర్లు, గృహసారథులు, వాలంటీర్ల వ్యవస్థను రద్దు చేయాలని ఏపీ పంచాయతీ రాజ్ ఛాంబర్ అధ్యక్షుడు వైవీబీ రాజేంద్రప్రసాద్ డిమాండ్ చేశారు. విధులు, నిధులు లేక సర్పంచులు రెండేళ్లుగా కనీస అభివృద్ధి పనులు చేపట్టలేకపోతున్నారని తెలిపారు. వేసవిలో కనీసం బిందెడు నీళ్లు కూడా ఇవ్వలేని పరిస్థితిలో సర్పంచులు ఉక్కిరిబిక్కిరి అవుతున్నారన్నారు. ప్రత్యామ్నాయ వ్యవస్థను ఏర్పాటు చేసి సర్పంచ్లను ఉత్సవ విగ్రహాలు చేశారని ఆరోపించారు. ఇది 73, 74 రాజ్యాంగ సవరణకు వ్యతిరేకమన్నారు. వెంటనే గ్రామ సచివాలయాలను పంచాయతీల్లో విలీనం చేయాలని డిమాండ్ చేశారు. కేంద్ర ప్రభుత్వం ఇచ్చిన ఆర్థిక సంఘం నిధులు 8 వేల 600 కోట్లను రాష్ట్ర ప్రభుత్వం దొంగిలించిందని ఆరోపించారు.