అర్హులైన పేదలకు ఇళ్ల నిర్మాణాలు అనుకున్న సమయం కంటే ముందే పూర్తి చేసేలా చర్యలు తీసుకుంటున్నట్లు రాజ్యసభ సభ్యులు మోపిదేవి వెంకటరమణ చెప్పారు. గుంటూరు జిల్లా రేపల్లె పట్టణం 18 వార్డు శివారులోని జగనన్న కాలనీలో పలు ఇళ్ల నిర్మాణాలకు, 13వ వార్డులో వైఎస్సార్ పట్టణ ఆరోగ్య కేంద్రం నూతన భవనానికి ఆయన శంకుస్థాపన చేశారు. ప్రతి పేదవాడి సొంతింటి కల నెరవేర్చేందుకు ముఖ్యమంత్రి జగన్ కృషి చేస్తున్నారని చెప్పారు.
కరోనా విపత్కర పరిస్థితుల్లోనూ సీఎం జగన్ పేదల అభ్యున్నతికి అనేక సంక్షేమ పథకాలు ప్రవేశపెట్టారని కొనియాడారు. కృష్ణా నదీ జలాల విషయంలో తెలంగాణ ప్రభుత్వం అనుసరిస్తున్న తీరు సరైంది కాదని ఎంపీ వ్యాఖ్యనించారు. తెలుగు రాష్ట్రాలు విడిపోయినప్పుడు జలాలపై స్పష్టమైన నిర్ణయాలు తీసుకున్నారన్నారు. ఏపీకి అన్యాయం జరిగేలా తెలంగాణ ప్రభుత్వం నిర్ణయాలు తీసుకుంటే చూస్తూ ఊరుకునేది లేదని తేల్చి చెప్పారు.