విడాకులు అడిగినా ఇవ్వకపోవడంపై విసుగు చెందిన భర్త... భార్య మెడపై కత్తితో దాడి చేసి తీవ్రంగా గాయపరిచాడు. ఈ ఘటన గుంటూరు జిల్లా పొన్నూరులో జరిగింది. చిలకలూరిపేట మండలం యనమదల గ్రామానికి చెందిన పోగుల ఉమామహేశ్వరరావుకు పొన్నూరుకు చెందిన విజయకుమారికి కొన్నేళ్ల క్రితం వివాహం జరిగింది. ఉమామహేశ్వరరావు స్కూల్ అసిస్టెంట్గా ఉద్యోగం చేస్తున్నారు.
భార్య భర్తల మధ్య విభేదాలు తలెత్తిన కారణంగా.. 2013లో విజయ కుమారి నగరంపాలెం పోలీస్ స్టేషన్లో భర్తపై కేసు పెట్టింది. అనంతరం ఇద్దరూ రాజీ పడ్డారు. అప్పటి నుంచి జీతంలో కొంత భాగం భార్యకు ఇస్తూనే ఉన్నాడు. అయితే తన నుంచి విడాకులు కావాలని ఉమామహేశ్వరరావు కొంతకాలంగా కోరుతున్నప్పటికీ విజయకుమారి అంగీకరించలేదు. ఈ విషయమై అసంతృప్తితో, ఆగ్రహంతో ఉన్న ఉమామహేశ్వరరావు... శనివారం నేరుగా ఇంటికి వెళ్లి ఆమెపై కత్తితో దాడి చేశాడు. గమనించిన స్థానికులు బాధితురాలిని ఆసుపత్రికి తరలించారు. ప్రస్తుతం ఆమె ఆరోగ్యం నిలకడగా ఉంది.