Bail Granted to Aadireddy Apparao: జగజ్జనని చిట్‌ఫండ్స్‌ ప్రైవేట్‌ లిమిటెడ్‌ ఎండీ ఆదిరెడ్డి అప్పారావు, డైరెక్టర్‌ ఆదిరెడ్డి శ్రీనివాస్‌కు హైకోర్టులో ఊరట లభించింది. సీఐడీ నమోదు చేసిన కేసులో ఇద్దరికీ షరతులతో బెయిలు మంజూరు చేస్తూ హైకోర్టు న్యాయమూర్తి జస్టిస్‌ కె.శ్రీనివాసరెడ్డి ఉత్తర్వులు జారీ చేశారు. అభియోగపత్రం దాఖలు చేసే వరకు ప్రతి బుధ, శుక్రవారాల్లో ఉదయం 10 నుంచి మధ్యాహ్నం 1 గంటలోపు తమ పరిధిలోని ఠాణాలో హాజరుకావాలని స్పష్టంచేశారు.
50 వేల వ్యక్తిగత బాండ్‌తో ఒక్కొక్కరు రెండు పూచీకత్తులు సమర్పించాలన్నారు. చిట్‌ సహాయ రిజిస్ట్రార్‌ ఇచ్చిన ఫిర్యాదు మేరకు ఏప్రిల్‌ 30న అప్పారావు, శ్రీనివాస్‌ను సీఐడీ అరెస్టు చేయగా.. అప్పటి నుంచి జైల్లోనే ఉన్నారని న్యాయమూర్తి గుర్తు చేశారు. పిటిషనర్లను అరెస్టు చేయవద్దని ఈ ఏడాది మార్చిలో హైకోర్టు ఉత్తర్వులిచ్చిందని.. పైగా ఇద్దరూ ఇప్పటికే దర్యాప్తునకు సహకరించారని అన్నారు. ఆదిరెడ్డి అప్పారావు వయసు 70 ఏళ్లని గుర్తుచేసిన న్యాయమూర్తి.. పిటిషనర్లను ఇంకా రిమాండ్‌లో ఉంచాల్సిన అవసరం లేదన్నారు. ఈ అంశాలన్నింటినీ పరిగణనలోకి తీసుకొని బెయిలు మంజూరు చేస్తున్నట్లు ప్రకటించారు.
C.I.D లోపాలను న్యాయమూర్తి ఎత్తిచూపారు. జగజ్జనని తమ సొమ్ము చెల్లించలేదని ఏ ఒక్క చందాదారుడి నుంచీ ఫిర్యాదు లేదని గుర్తుచేశారు. చట్టవిరుద్ధంగా డిపాజిట్లు స్వీకరించారంటూ సాధారణ ఆరోపణలు చేయడమే తప్ప... వాటికి బలం చేకూర్చే ఆధారాలు ఏమీ లేవన్నారు. చందాదారులకు సొమ్ము తిరిగి చెల్లించకుండా అధిక వడ్డీ ఆశచూపి, ఆ సొమ్మును పిటిషనర్ల వ్యాపారాల్లోకి మళ్లించారని C.I.D పేర్కొందని.. ఈ విషయంలో ఆరోపణ తప్ప సంబంధించిన ఎలాంటి ఆధారాలను అధికారులు చూపలేదని తెలిపారు. చందాదారులకు సొమ్ము చెల్లించడంలో విఫలమయ్యారని ఒక్కరూ ఫిర్యాదు చేసినట్లు కనిపించడం లేదని... అయినా చిట్‌ సహాయ రిజిస్ట్రార్‌ పిటిషనర్లపై సీఐడీకి ఫిర్యాదు చేశారన్నారు.