NO FUNDS TO NADU NEDU : రాష్ట్రంలో ప్రభుత్వ విద్యా సంస్థల్లో మౌలిక సదుపాయాలు కల్పించేందుకు వైఎస్సార్సీపీ ప్రభుత్వం ఘనంగా చేపట్టిన నాడు నేడు పథకం రెండో దశ పనులకు.. 2021 ఆగస్టు 16న ముఖ్యమంత్రి జగన్ శ్రీకారం చుట్టారు. మొత్తం 22 వేల 344 పాఠశాలలు, వసతి గృహాలు, జూనియర్‌ కళాశాలల్లో వీటికి సంబంధించిన పనులు చేపట్టారు. వీటికి అదనంగా నాబార్డు నుంచి 2 వేల 538 కోట్ల రూపాయలు తీసుకొచ్చి.. 3 వేల 199 పాఠశాలల్లో పనులు చేస్తామన్నారు. పనులను 2022 జులై నాటికి పూర్తి చేస్తామని అధికారులు ప్రకటించారు.
అయితే పరిపాలన అనుమతులు ఇచ్చేందుకే దాదాపు సంవత్సరం సమయం పట్టింది. ఆ తర్వాత గడువును పెంచి.. ఈ నెల చివరికి పనులను పూర్తి చేయాలని అధికారులు లక్ష్యంగా పెట్టుకున్నారు. అయినా ఫలితం మాత్రం కనిపించడం లేదు. పాఠశాలల వద్ద సైతం నిధుల్లేక.. కొన్ని చోట్ల స్వల్పంగా సిమెంటు, ఇసుక నిల్వలు ఉన్నా పనులు జరగడం లేదు. వైఎస్సార్ జిల్లాలోని ఓ పాఠశాలలో గత అక్టోబర్ నుంచి నిధుల్లేక పనులు నిలిచిపోయాయి. ఇక్కడ మిగిలి ఉన్న సిమెంట్‌ పనికి రాకుండా పోయే పరిస్థితి నెలకొంది.
నిధుల విడుదలలో తీవ్ర జాప్యంతో పాఠశాలల్లో నాడు-నేడు పనులు అనుకున్న మేర జరగడం లేదు. నిధులు ఖర్చు చేయని మొత్తాలను అవసరమైన పాఠశాలలకు సర్దుబాటు చేసేందుకు.. రాష్ట్రవ్యాప్తంగా 266.24 కోట్ల రూపాయలను అధికారులు వెనక్కి తీసుకున్నారు. ఇప్పటికే జరిగిన పనుల్లోనూ నాణ్యతా లోపాలు బయటపడుతున్నాయి. పాత శ్లాబులకు చేసిన ప్లాస్టరింగ్‌ పెచ్చులుగా ఊడి పడుతోంది. విశాఖపట్నం జిల్లా పద్మనాభం పరిధిలోని అర్చకునిపాలెం ప్రాథమిక పాఠశాలలో.. ఈ నెల 7న భవనం శ్లాబు పెచ్చులు ఊడటంతో ముగ్గురు చిన్నారులకు గాయాలయ్యాయి.