FOUR YEARS BOY DIED IN DOGS ATTACK : అభం శుభం తెలియని నాలుగేళ్ల బాలుడు..! సెలవు రోజు కావడంతో ఆటవిడుపుగా ఉంటుందనే ఆలోచనతో తండ్రి కొత్తతావుకు తీసుకెళ్తే ఆనందంతో ఉబ్బితబ్బిబయ్యాడు. తండ్రి పని చేసుకుంటుండగా ఒక్కడే పక్కనే ఉన్న అక్క దగ్గరికి వెళ్లాలనుకున్నాడు. ఉన్నట్టుండి వీధి కుక్కలు దాడిచేయడంతో.. తప్పించుకునేందుకు శక్తి మేర ప్రయత్నించాడు. జంతువులను వేటాడినట్టుగా కుక్కలన్నీ ఆ చిన్నారిపై అన్ని వైపుల నుంచి దాడిచేయడంతో నిస్సహాయంగా శరీరాన్ని వాటికి అప్పగించి ప్రాణాలు కోల్పోయాడు. ఈ హృదయ విదారక ఘటన తెలంగాణలోని అంబర్‌పేట్‌ పోలీసుస్టేషన్‌ పరిధిలో చోటుచేసుకుంది.
పోలీసులు తెలిపిన వివరాల ప్రకారం.. నిజామాబాద్‌ జిల్లా ఇందల్‌వాయి మండల కేంద్రానికి చెందిన గంగాధర్‌ నాలుగేళ్ల క్రితం ఉపాధి నిమిత్తం హైదరాబాద్‌కు వలస వచ్చాడు. ఛే నంబరు చౌరస్తాలోని ఓ కారు సర్వీస్‌ సెంటర్‌లో వాచ్‌మెన్‌గా పనిచేస్తున్నాడు. భార్య జనప్రియ, ఆరేళ్ల కుమార్తె, కుమారుడు ప్రదీప్‌లతో కలిసి బాగ్‌అంబర్‌పేట ఎరుకుల బస్తీలో నివాసం ఉంటున్నాడు. ఆదివారం సెలవు కావడంతో పిల్లలిద్దర్నీ వెంటబెట్టుకుని తాను పనిచేస్తున్న సర్వీస్‌ సెంటర్‌ వద్దకు తీసుకెళ్లాడు. కుమార్తెను పార్కింగ్‌ ప్రదేశం వద్ద ఉన్న క్యాబిన్‌లో ఉంచి, కుమారుడిని సర్వీస్‌ సెంటర్‌ లోపలికి తీసుకెళ్లాడు.