కోస్తాంధ్రలో సత్తా చాటిన వైకాపా

పురపోరులో వైకాపా ఏకపక్ష విజయం సాధించింది. కృష్ణా, గుంటూరు, ఉభయ గోదావరి, ఉత్తరాంధ్ర జిల్లాల్లో ఫ్యాన్‌ గాలి వీచింది. అతి కొద్ది స్థానాల్లో మాత్రమే.... ప్రతిపక్ష తెలుగుదేశం పోరాడింది.

గుంటూరు జిల్లాలో వైకాపా భారీ విజయాలు సాధించింది. వినుకొండ, సత్తెనపల్లి, తెనాలి, చిలకలూరిపేట, రేపల్లె మున్సిపాలిటీలు అధికార పక్షం వశమయ్యాయి. తెనాలి, చిలకలూరిపేటలో మాత్రమే తెలుగుదేశం ఓ మోస్తరు స్థానాలు సాధించింది. తెనాలి 16వ వార్డులో ఫలితం ఉత్కంఠ రేపింది. తెలుగుదేశం అభ్యర్థి దివి అనిత కేవలం 4 ఓట్లతో గెలిచారు. అక్కడ 3 సార్లు కౌంటింగ్‌ నిర్వహించారు.

కృష్ణాజిల్లాలో...

కృష్ణాజిల్లా పెడనలో వైకాపా భారీ విజయం సాధించింది. ఉయ్యూరు నగర పంచాయతీని కైవసం చేసుకొంది. నందిగామ అధికార పక్షం వశమైంది.

పశ్చిమగోదావరి జిల్లాలో...

పశ్చిమ గోదావరి జిల్లాలోని కొవ్వూరు మున్సిపాలిటీని వైకాపా కైవసం చేసుకొంది. నరసాపురంలోనూ వైకాపా జెండా ఎగరగా... జనసేన 4 స్థానాల్లో గెలిచింది. నిడదవోలు, జంగారెడ్డి గూడెంలో ఫ్యాన్ పార్టీకి భారీ విజయాలు దక్కాయి.

తూర్పుగోదావరి జిల్లాలో...

తూర్పుగోదావరి జిల్లా తుని మున్సిపాలిటీలో వైకాపా ఘన విజయం సాధించింది. అక్కడ మొత్తం 30 వార్డులుండగా... అన్నీ వైకాపా సొంతమయ్యాయి. ఏలేశ్వరంలోనూ భారీ విజయం దక్కింది. పిఠాపురంలో 30 స్థానాలకు గాను 20 చోట్ల వైకాపా జెండా ఎగిరింది. మండపేట మున్సిపాలిటీని సొంతం చేసుకున్న ఆ పార్టీ... గొల్లప్రోలు నగర పంచాయతీలోనూ భారీ విజయం సాధించింది.

విశాఖ జిల్లాలో....

విశాఖ జిల్లాలోని ఎలమంచిలి మున్సిపాలిటీని భారీ మెజార్టీతో వైకాపా సొంతం చేసుకొంది. నర్సీపట్నంలో తెలుగుదేశం కాస్త పోరాడింది. 28 స్థానాల్లో వైకాపా 14, తెదేపా 12, జనసేన 1 గెలిచాయి.

విజయనగరం జిల్లా....

విజయనగరం జిల్లాలోని పార్వతీపురం మున్సిపాలిటీలో వైకాపా భారీ విజయం సాధించింది. 3 చోట్ల స్వతంత్రులు గెలిచారు. సాలూరులో వైకాపా ఘన విజయం సాధించింది. బొబ్బిలిలో తెలుగుదేశం పోరాడింది. 31 స్థానాల్లో వైకాపా 18, తెదేపా 11, ఇతరులు 1 చోట్ల గెలిచారు. నెల్లిమర్ల నగర పంచాయతీలో వైకాపా గెలిచింది. అక్కడ ఛైర్‌పర్సన్ అభ్యర్థి మహాలక్ష్మి ఓటమిపాలయ్యారు.

పాలకొండ వైకాపా వశం...

శ్రీకాకుళం జిల్లా పాలకొండ నగర పంచాయతీ వైకాపా వశమైంది. పలాస-కాశీబుగ్గ, ఇచ్ఛాపురంలోనూ ఆ పార్టీకి భారీ విజయాలు దక్కాయి.

ఇదీ చదవండి: