గుంటూరు జిల్లా తెనాలిలోని గంగానమ్మ పేటలో పదో తరగతి చదువుతున్న విద్యార్థులు అదృశ్యమవగా.. టూ టౌన్ పోలీసులు వారిని వెతికి పట్టుకుని తల్లిదండ్రులకు అప్పగించారు. గత మంగళవారం సాయంత్రం ముగ్గురు విద్యార్థులు అదృశ్యమవగా.. వారి తల్లిదండ్రులు పోలీసులకు ఫిర్యాదు చేశారు. సీఐ శ్రీనివాసరావు కేసు నమోదు చేసి దర్యాప్తు చేపట్టారు.
ఆ ముగ్గురినీ గంటూరులో పోలీసులు అదుపులోకి తీసుకున్నారు. విచారణ చేయగా... తమకు చదువుపై ఆసక్తి లేదనీ, మానసికంగా ఒత్తిడికి గురవుతున్నామని చెప్పినట్లు సీఐ తెలిపారు. మానసిక ఒత్తిడి నుంచి బయటపడేందుకే ఇల్లు విడిచి వెళ్లిపోదామని నిర్ణయించుకున్నట్లు విద్యార్థులు తెలిపారన్నారు. వారిని తల్లిదండ్రులకు అప్పగించినట్లు చెప్పారు.