ప్రాజెక్టులకు నిధులెక్కడ?... ఆదాయం పెంచుకునే మార్గాలేవి: చంద్రబాబు

రాష్ట్ర ప్రయోజనాలు దెబ్బతీసే విధంగా రెండో బడ్జెట్ ఉందని తెదేపా అధినేత చంద్రబాబు విమర్శించారు. అరకొర బడ్జెట్​తో జలవనరుల ప్రాజెక్టులు ఎలా పూర్తి చేస్తారో సమాధానం చెప్పాలని డిమాండ్ చేశారు.

ప్రభుత్వం ప్రవేశపెట్టిన రెండో బడ్జెట్ అంతా అంకెల గారడీనే అని తెదేపా అధినేత చంద్రబాబు విమర్శించారు. మూలధన వ్యయం సగం కూడా ఖర్చు చేయలేదని... అరకొర బడ్జెట్​తో జలవనరుల ప్రాజెక్టులు ఎలా పూర్తి చేస్తారో సమాధానం చెప్పాలని డిమాండ్ చేశారు. ప్రతిపక్షానికి మాట్లాడే అవకాశం ఇవ్వకుండా దొడ్డిదారిన బిల్లులు ప్రవేశపెట్టుకునేందుకే అసెంబ్లీ సమావేశాలు పెట్టారని తీవ్ర స్థాయిలో ధ్వజమెత్తారు.

ఆదాయం పెంచుకునే మార్గాలు ఎక్కడా చూపించకుండా అప్పులు మాత్రమే చూపుతున్నారని ఆరోపణలు చేశారు. ఏడాదిలో విధ్వంసానికి నాంది పలికారు తప్ప అభివృద్ధి ఏం చేశారని ప్రశ్నించారు.అసెంబ్లీ జరిగిన తీరును తీవ్రంగా ఆక్షేపిస్తున్నానని అన్నారు.

ఏం సందేశం ఇచ్చారు?

ముఖ్యమంత్రి సహా ఎవ్వరూ మాస్కులు పెట్టుకోవాలనే ఆలోచన లేకుండా ప్రవర్తించారన్నారు. ప్రజలకు సభ ద్వారా ఎలాంటి సందేశమిచ్చారని మండిపడ్డారు. ప్రభుత్వం కరోనా నియంత్రణ మీద ఎక్కడా దృష్టి పెట్టలేదని ఆయన ఆరోపించారు. బాధ్యత కలిగిన ప్రజా ప్రతినిధులు కరోనాను పూర్తిగా విస్మరించి ప్రవర్తించారని చంద్రబాబు ఆగ్రహం వ్యక్తం చేశారు.

ఇదీ చదవండి:'గవర్నర్ చెప్పినవన్నీ అర్ధ సత్యాలు.. సత్యదూరాలే'