మాస్కు అడిగినందుకు ఎస్సీ వైద్యుడిని దారుణంగా హింసించిన ప్రభుత్వం... ఇప్పుడు కనీస సౌకర్యాలు కల్పించమని అడిగిన నాదెండ్ల గిరిజన వైద్యాధికారిని అరెస్టు చేసిందని తెలుగుదేశం పార్టీ అధినేత చంద్రబాబు ధ్వజమెత్తారు. కరోనా కేసులు పెరడానికి కారణం ప్రభుత్వమా లేక ప్రాణాలకు తెగించి విధులు నిర్వహిస్తున్న వైద్యులా అని నిలదీశారు. లాక్ డౌన్ సమయంలో ర్యాలీలు, సభలు నిర్వహించి వైకాపా నేతలే వైరస్ వ్యాప్తికి కారణమయ్యారని ఆరోపించారు.
నరసరావుపేటలో నిర్వహించిన సమావేశంలో ఎక్కడా భౌతిక దూరం పాటింపచేయలేదని చంద్రబాబు విమర్శించారు. గిరిజన వైద్యాధికారిని డిజాస్టర్ మేనేజ్మెంట్ యాక్ట్ కింద అరెస్ట్ చేయడం ఏమిటని ఆక్షేపించారు. ఇదేం జులుం అని మండిపడిన చంద్రబాబు....డాక్టర్ సోమ్లూ నాయక్ను వెంటనే విడుదల చేయాలని డిమాండ్ చేశారు. అలాగే ఆయన మీద తీసుకున్న చర్యలన్నింటినీ బేషరతుగా ఉపసంహరించుకోవాలని ట్వీట్ చేశారు.