మీ అమ్మతనానికి చలించిపోయాం: డీజీపీ

తూర్పు గోదావరి జిల్లా తుని పట్టణానికి చెందిన ఓ మహిళ మండుటెండలో విధులు నిర్వర్తిస్తున్న పోలీసులకు శీతల పానీయాలు అందించిన వీడియో సామాజిక మాధ్యమాల్లో వైరల్‌ అయిన విషయం తెలిసిందే. దీనిపై డీజీపీ గౌతమ్‌ సవాంగ్‌ స్పందించారు. అమె వివరాలు తెలుసుకొని, వీడియో కాన్ఫరెన్స్‌ ద్వారా నేరుగా ఆమెతో మాట్లాడారు. కృతజ్ఞతలు తెలిపారు. ‘‘మీ అమ్మతనానికి మేమంతా చలించిపోయాం. విధి నిర్వహణలో ఉన్న పోలీసులపై మీరు చూపిన ప్రేమకు మేమంతా సెల్యూట్‌ చేస్తున్నామమ్మా’’ అంటూ ధన్యవాదాలు తెలిపారు.

లాక్ డౌన్ వేళ రోడ్లపై విధులు నిర్వహిస్తూ పోలీసులు పడుతున్న కష్టాన్ని చూసి చలించిన ఓ మహిళ వారికి శీతల పానీయం తెచ్చి ఇచ్చింది. తూర్పు గోదావరి జిల్లా తునిలో జరిగిన ఈ ఘటనకు సంబంధించిన వీడియో సామాజిక మాధ్యమాల్లో వైరల్ అయ్యింది. చిన్నపాటి పనులు చేసుకునే ఆ మహిళ పోలీసులపై చూపిన ఔదార్యంపై ప్రశంసలు వచ్చాయి. ఆ ఘటన రాష్ట్ర డీజీపీని సైతం కదిలించింది. ఆయనే ఇవాళ వీడియో కాల్ ద్వారా ఆ మహిళతో మాట్లాడారు.

తుని పోలీసులు ఆమెను వెంటబెట్టుకుని వీడియో కాన్ఫరెన్స్ లో డీజీపీతో మాట్లాడించారు. కాన్ఫరెన్స్ ద్వారానే డీజీపీ సవాంగ్ ఆమెకు కృతజ్ఞతలు తెలిపారు. అమ్మతనాన్ని చూపించారని కొనియాడారు. అందుకు ఆ మహిళ కూడా నవ్వుతూ రెండు చేతులు జోడించి నమస్కరించింది. మహిళ చూపిన ఔదార్యం... పోలీస్ బాస్ ఆమెతో మాట్లాడటం... ఇవన్నీ ప్రజలు - పోలీసుల మధ్య సుహృద్భావ వాతావరణం పెంచేలా ఉన్నాయి.

ఇవీ చదవండి: