అమెరికాలో ప్రేమ... ఆంధ్రాలో పెళ్లి

భాషలు వేరైనా వారిరువురి భావాలు ఒక్కటయ్యాయి. మతాలు కలవకపోయినా మనసులు కలిశాయి. పెద్దల అంగీకారంతో ఆంద్ర అమ్మాయి అమెరికా అబ్బాయి పెళ్లి చేసుకున్నారు. భారతీయ సంస్కృతి, సంప్రదాయాలపై ఇష్టంతో హిందూ సంప్రదాయంలో తన సొంతూరిలోనే తనకు నచ్చిన వాడిని అమ్మాయి వివాహం చేసుకుంది. అమెరికాలో వారి ప్రేమకథ ఇక్కడ వారి పెళ్లి విశేషాల గురించి మనమూ తెలుసుకుందామా..!

గుంటూరు జిల్లా చెరుకుపల్లి మండలం గూడవల్లి గ్రామానికి చెందిన ప్రముఖ వైద్యుడు డాక్టర్ కొడాలి పాపారావుకు ముగ్గురు కుమార్తెలు, ఒక కుమారుడు. పెద్ద కుమార్తె లక్ష్మి.. ఆమె భర్త గోగినేని రవీంద్ర కుమార్ దంపతులు అమెరికాలో స్థిరపడ్డారు. వారికి ఇద్దరు కుమార్తెలు. చిన్న కుమార్తె రూప అమెరికాలోనే పుట్టి పెరిగింది. ఆఫ్రికన్ స్టడీస్ పూర్తి చేసుకుని.. జర్నలిజంపై మక్కువతో వైల్డ్ లైఫ్ జర్నలిస్ట్​గా కెరీర్​ను ప్రారంభించింది. నైరోబి కేంద్రంగా ప్రముఖ ఛానెల్​లో ఉద్యోగం చేస్తోంది. ఈ క్రమంలోనే వైల్డ్ లైఫ్​లో ఫోటో జర్నలిస్ట్​గా పని చేస్తోన్న ట్రవర్​తో పరిచయం ఏర్పడింది. ఆరేళ్లుగా ఇద్దరు కలిసి ఉద్యోగ విధులు నిర్వర్తిస్తున్నారు. ఇద్దరి మధ్య స్నేహం ప్రేమగా మారింది. విషయం తల్లిదండ్రులకు చెప్పటంతో వారి ప్రేమను గౌరవిస్తూ వివాహం చేసేందుకు అంగీకరించారు.

హిందూ సంప్రదాయంలో పెళ్లి

ఇద్దరూ అమెరికా పౌరులు అయినప్పటికీ రూపకు భారతీయ సంప్రదాయాలు, సంస్కృతిపై ఇష్టంతో పెళ్లి అమ్మ సొంత గ్రామమైన గూడవల్లిలోని తాతయ్య ఇంటి దగ్గర జరుపుకోవాలని ఆశతో వరుడిని ఒప్పించింది. అతను అందుకు అంగీకరించటంతో హిందూ ధర్మం ప్రకారం వారి వివాహ వేడుక ఘనంగా జరిగింది.

సొంతూరంటే ఇష్టంతోనే

ఇప్పటికే తన ప్రియుడ ట్రైవర్​ను నాలుగు సార్లు గూడవల్లికి తీసుకువచ్చినట్లు రూప చెబుతోంది. అతను ఇక్కడి వాతావరణం బాగా ఇష్టపడతాడని తెలిపింది. దేశాలు వేరైనా.. మనసులు కలవటంతో వారిద్దరూ ఒక్కటయ్యారు. అంతే కాకుండా తెలుగునేలపై మక్కువతో ఇక్కడే పెళ్లి చేసుకోవటం విశేషం.

ఇదీ చూడండి