సచివాలయం వద్ద ఆత్మహత్యకు యత్నించిన నెల్లూరు జిల్లాకు చెందిన దంపతులు మళ్లీ సీఎం క్యాంప్ ఆఫీస్ వద్ద ఆత్మహత్యాయత్నం చేయడం కలకలం రేపింది. తమకు న్యాయం చేయలంటూ చిట్టమూరు మండలం చిలమూరుకు చెందిన అరిగెల నాగార్జున దంపతులు సీఎంను కలవాలని కోరుతూనే.. అతని భార్య పురుగుల మందు తాగి ఆత్మహత్యాయత్నం చేసింది.
భూములను ఆన్‌లైన్‌లో నమోదు చేసి.. పాస్‌ పుస్తకం ఇవ్వడానికి దుత్తలూరు తహసీల్దార్ చంద్రశేఖర్ రూ.కోటిన్నర తీసుకుని పని చేయడం లేదని ఆరోపిస్తున్నారు. తమ భూమితో పాటు బంధువుల పొలాన్ని ఆన్‌లైన్‌లో నమోదు చేసేందుకు రూ.కోటిన్నర వసూలు చేసి ఇచ్చామని బాధితులు చెబుతున్నారు. ఏడాది అవుతున్నా.. పని చేయకపోవడంతో తిరిగి డబ్బులు అడిగితే తనను హత్య చేయించేందుకు కుట్రపన్నారని వాపోయారు. గతంలో ఒకసారి న్యాయం చేయాలని నెల్లూరు కలెక్టరేట్‌ వద్ద ఆత్మహత్యాయత్నం చేయగా.. అధికారులు విచారణ చేసి తహసీల్దార్‌ను సస్పెండ్‌ చేశారన్నారు. మళ్లీ తహసీల్దార్ వేధింపులు భరించలేక ఈ అఘాయిత్యానికి పాల్పడినట్లు బాధితులు కన్నీరుమున్నీరయ్యారు.