జీపీ నిధుల వినియోగంపై సర్కారు ఆంక్షలు

గ్రామ పంచాయతీలకు కేంద్రం విడుదల చేసిన 15వ ఆర్థిక సంఘం నిధులను.. పంచాయతీ పీడీ ఖాతాలకు జమచేసిన రాష్ట్ర ప్రభుత్వం.. వాటి వినియోగంపై ఆంక్షలు విధించింది. విద్యుత్‌ బిల్లులు, గ్రీన్‌ అంబాసిడర్ల జీతాలకు.. ఆ నిధులు ఖర్చు చేయాలని పంచాయతీ అధికారుల నుంచి సర్పంచులకు ఒత్తిళ్లు వస్తున్నాయి. కేంద్రం ఇచ్చిన నిధులపై.. రాష్ట్ర ప్రభుత్వ పెత్తనమేంటని.. సర్పంచులు మండిపడుతున్నారు. సర్పంచులుగా గెలిచి.. ఏడాదిన్నర దాటినా.. గ్రామాల్లో ఎలాంటి అభివృద్ధి పనులు చేయకపోతే.. ప్రజలకు మొహం ఎలా చూపించాలని ప్రశ్నిస్తున్నారు.

రాష్ట్రంలోని 13 వేల 340 గ్రామపంచాయతీలకు 15వ ఆర్థిక సంఘం.. 948 కోట్ల రూపాయలు విడుదల చేసింది. ఆగస్టు నెలలో నిధులు విడుదలైన వెంటనే.. రాష్ట్ర ప్రభుత్వం వాటిని తీసేసుకుంది. గతంలో 14వ ఆర్థిక సంఘం నిధులనూ ప్రభుత్వం ఇలాగే లాగేసుకుంది. దీంతో ఆగ్రహించిన సర్పంచులు.. రాష్ట్రవ్యాప్తంగా ఆందోళనలకు దిగారు. వివిధ రూపాల్లో నిరసనలు తెలిపారు. దీంతో వెనక్కి తగ్గిన ప్రభుత్వం ఎట్టకేలకు.. ఆ నిధుల్ని పంచాయతీల పీడీ ఖాతాల్లో జమ చేసింది.

ఏడాదిన్నరగా గ్రామాల్లో తాగునీరు, పారిశుద్ధ్యం పనులకు సొంత డబ్బులు వెచ్చించిన సర్పంచులు.. పీడీ ఖాతాల్లో జమ చేసిన నిధులతో అప్పులు తీర్చుకోవచ్చని భావించారు. అయితే.. ఆర్థిక సంఘం నిధుల వినియోగంపై ఆయా జిల్లాల పంచాయతీ అధికారులు ఆంక్షలు విధించారు. వీటితో విద్యుత్ బిల్లుల బకాయిలు, ఇంటింటికీ తిరిగి చెత్త సేకరించే గ్రీన్‌ అంబాసిడర్ల జీతాలు చెల్లించాలని సూచించారు. వాస్తవానికి గ్రీన్‌ అంబాసిడర్ల వేతనాలు.. క్లీన్‌ ఏపీ కింద ప్రభుత్వమే చెల్లించాల్సి ఉంది.

ప్రభుత్వం ఆ పని చేయకుండా.. ఆర్థిక సంఘం నిధుల నుంచి చెల్లించాలని చెప్పడం పట్ల.. సర్పంచులు అభ్యంతరం వ్యక్తం చేస్తున్నారు. గ్రామాల్లో ఒక్క రోడ్డు కూడా వేయలేకపోతున్నామని.. సర్పంచులు వాపోతున్నారు. పాడైపోయిన రహదారులకు కనీసం మరమ్మతులు చేయించడానికైనా నిధులు వాడుకునేందుకు అనుమతించాలని కోరుతున్నారు. పారిశుద్ధ్యం, తాగునీటి అవసరాలకు నిధులు కేటాయించకపోతే ఎలాగని ప్రశ్నిస్తున్నారు..

రాష్ట్రంలోని 13 వేల 340 పంచాయతీలకూ.. కేంద్ర, రాష్ట్ర ప్రభుత్వాలిచ్చే నిధులే కీలక ఆధారం. అలాంటిది ఆర్థిక సంఘం నిధులపై ఆంక్షలు విధించడం.. తమను ఇబ్బంది పెట్టడమేనని.. సర్పంచులు భావిస్తున్నారు. సర్పంచులకు నిధులతోపాటు.. అధికారాలు ఇవ్వాలని కోరుతున్నారు. విద్యుత్ బిల్లుల విషయంలో పారదర్శకతే లేదంటున్నారు. గతంలో 14వ ఆర్థిక సంఘం నిధుల్ని చెప్పకుండా తీసుకున్నారని.. మళ్లీ ఇప్పుడు బిల్లులంటే ఎలాగని ప్రశ్నిస్తున్నారు. గతంలో పంచాయతీల విద్యుత్‌ బిల్లులను ప్రభుత్వాలే చెల్లించిన విషయాన్ని గుర్తుచేస్తున్నారు. గ్రీన్ అంబాసిడర్ల జీతాల విషయంలోనూ తమపై ఒత్తిడి తేవొద్దని డిమాండ్ చేస్తున్నారు..

నిధుల వినియోగంపై ఆంక్షలు అమలు చేస్తే.. మళ్లీ ఆందోళన చేస్తామని.. సర్పంచులు హెచ్చరిస్తున్నారు. ముఖ్యమంత్రి ఈ విషయంలో జోక్యం చేసుకుని.. సర్పంచులకు ఇబ్బంది లేకుండా చూడాలని కోరుతున్నారు.

ఇవీ చదవండి: