Effects of Power Outage in Hospital: రాష్ట్రంలో అప్రకటిత విద్యుత్ కోతలు లేవనేది అటు ప్రభుత్వం.. ఇటు విద్యుత్ శాఖ అధికారులు చెబుతున్న మాట. డిమాండ్ ఉన్నప్పటికీ ఎక్కడా కోతలు లేకుండా విద్యుత్ సరఫరా చేస్తున్నామని అధికార వర్గాలు గంటాపథంగా చెబుతున్నాయి. మండుతున్న ఎండలు, ఉక్కపోతకు తోడు.. ఎడా పెడా విధిస్తున్న విద్యుత్ కోతలు సామాన్య ప్రజలను ఉక్కిరిబిక్కిరి చేస్తున్నాయి. విద్యుత్ కోతలు లేవంటూనే.. ఇష్టారీతిగా విధిస్తున్న విద్యుత్ కోతలతో సామాన్యులతో పాటు.. వివిధ చికిత్సల నిమిత్తం ప్రభుత్వ ఆస్పత్రులకు వచ్చే రోగులు సైతం ఇబ్బంది పడుతున్నారు.
ఇదీ ఏలూరు జిల్లాలోని చింతలపూడి ప్రభుత్వ ఆసుపత్రిలోని పరిస్థితి. నిత్యం చుట్టుపక్కల గ్రామాల నుంచి పెద్ద సంఖ్యలో రోగులు ఇక్కడికి వస్తుంటారు. చింతలపూడి పరిసర గ్రామాలతో పాటు తెలంగాణలోని సత్తుపల్లి నుంచి సైతం ఈ ఆసుపత్రికి రోగులు వస్తుంటారు. వైద్యం కోసం వచ్చిన వారు అనారోగ్య సమస్య కన్నా విద్యుత్ కోతలతోనే ఎక్కువ ఇబ్బందులు పడుతున్నారు. సమయంతో పని లేకుండా ఇష్టారీతిగా విధిస్తున్న కోతలతో ఇన్‌పేషంట్‌లతో పాటు సాధారణ ఓపీ విభాగాల్లోనూ రోగులు ఇబ్బందులు ఎదుర్కొంటున్నారు. జనరల్‌, ప్రసూతి విభాగం, ఆపరేషన్ గది.. ఇలా ఆసుపత్రిలో ఎటు చూసినా అంధకారమేనని రోగులు వాపోతున్నారు.
రోగులతో పాటు వైద్య సేవలు అందించే డాక్టర్లకు సైతం ఉక్కపోత అవస్థలు తప్పడం లేదు. ఆస్పత్రిలో వివిధ విభాగాల్లో విధులు నిర్వహించే సిబ్బంది.. విద్యుత్ కోతలతో సతమతమవుతున్నారు. రోగుల వెంట వచ్చే సహాయకులు సైతం విద్యుత్ సరఫరా అంతరాయంతో.. మండు టెండలకు ఇబ్బందులు పడుతున్నారు. చింతలపూడి ఆస్పత్రిలో విద్యుత్ సరఫరాకు అంతరాయం ఏర్పడినప్పుడు, అత్యవసర సమయాల్లో వినియోగించేందుకు వీలుగా జనరేటర్ అందుబాటులో ఉంది. కానీ డీజిల్కు సంబంధించి అధికారులు పరిమితి విధించడంతో జనరేటర్ నిరుపయోగంగా మారిందని రోగులు ఆరోపిస్తున్నారు.