సాధ్యమైనంత త్వరలో పోలవరం పూర్తి చేసి నీళ్లందిస్తాం
పోలవరంలో గత వరదలకు దెబ్బతిన్న డయాఫ్రమ్ వాల్ పునరుద్ధరణపై.. జలవనరులశాఖ మంత్రి అంబటి రాంబాబు అధికారులతో చర్చించారు. పోలవరం ప్రాజెక్టును.. మంత్రిగా తొలిసారి సందర్శించిన రాంబాబు కుడి ప్రధాన కాలువ జంట గుహలు, హెడ్ రెగ్యులేటర్, స్పిల్ వే, ఫిష్ ల్యాడర్, పవర్ హౌస్, దిగువ కాపర్ డ్యామ్ పనులను పరిశీలించారు. తూర్పు గోదావరి జిల్లా వైపుఉన్న ఎర్త్ కం రాక్ ఫిల్ డ్యాం, డయాఫ్రం వాల్ దెబ్బతిన్న ప్రాంతాలనూ సందర్శించారు. అనంతరం అధికారులతో సమీక్షించారు. గత ప్రభుత్వంలో.. డయాఫ్రమ్ వాల్ పూర్తి కాకుండా కాఫర్ డ్యామ్ లు నిర్మించించడం వల్లే నష్టం జరిగిందని అంబటి చెప్పారు. డయాఫ్రం వాల్ కొత్తది కట్టాలా? లేదంటే పునర్నిర్మించాలా..? అనేదానిపై కొన్ని రోజుల్లో పూర్తి ప్రణాళిక సిద్ధం అవుతుందన్నారు. ఆ తర్వాతే ప్రాజెక్టు ఎప్పుడు పూర్తవుతుందో స్పష్టత వస్తుందని చెప్పారు.