ఉభయ గోదావరి జిల్లాలకు తలమానికమైన రాజమహేంద్రవరం విమానాశ్రయం వందల్లో రాకపోకలు సాగించే ప్రయాణికులతో మొదలై... లక్షలకు చేరి ఎన్నో మైలురాళ్లను అధిగమించింది. రాష్ట్రంలోనే ఒక ప్రత్యేక స్థానం సంపాదించుకుంది. నిరుడు కొవిడ్ ధాటికి తన వైభవాన్ని కోల్పోయింది. మళ్లీ ఇప్పుడిప్పుడే ప్రయాణికుల రాకపోకలు జోరందుకున్న వేళ.. సర్వీసులు పెరిగి విమానయానం పూర్వవైభవం దిశగా అడుగులు వేస్తోంది.
కొవిడ్‌కు ముందు..
ఏడాదికి 4 లక్షల మందికిపైగా రాకపోకలు సాగించే.. విమానాశ్రయంగా రాజమహేంద్రవరం గుర్తింపు తెచ్చుకుంది. అప్పటి వరకు గ్రేడు- 4లో ఉన్న విమానాశ్రయం గ్రేడు-3తో ఉన్నతి సాధించింది. 2019-20లో 4.4 లక్షల మంది రాకపోకలతో రికార్డు స్థాయికి చేరింది. ఎన్నడూ లేనివిధంగా ఏకంగా 22 విమాన సర్వీసుల రాకపోకలతో దూసుకెళ్లింది.
త్వరలో పెద్ద సర్వీసులు
కొవిడ్ తర్వాత 2 నుంచి 18 సర్వీసులు పెరిగాయి. బోయింగ్, కార్గో విమానాలు, దిల్లీ, ముంబయి, షిర్డీ వంటి దూర ప్రాంతాలకు సర్వీసులు పరిస్థితులు అనుకూలించాక అందుబాటులోకి రానున్నాయి.
రివ్వున ఎగిరే..
ప్రయాణికుల రద్దీ దృష్ట్యా కొవిడ్‌కు ముందు ఉన్న సర్వీసులన్నీ అందుబాటులోకి వస్తున్నాయి. తాజాగా చెన్నైకు ఒకటి, హైదరాబాద్‌కు ఒక సర్వీసు పెరగగా, ఈ నెల 13 నుంచి ట్రూజెట్‌ విమానయాన సంస్థ సేవలు ఆరంభించింది. వెరసి హైదరాబాద్‌కు ఆరు, బెంగళూరుకు రెండు, చెన్నైకు ఒకటి చొప్పున సర్వీసులు అందుబాటులో ఉన్నాయి.