చిత్రలేఖనంలో జాతీయ అవార్డులతో రామ్మోహనరావు...

చిత్రలేఖనంలో తనకంటూ ఓ ప్రత్యేకతను సంపాదించుకున్నారు. రెండేళ్లలో రాష్ట్ర, జాతీయ స్థాయి అవార్డులు సాధించి ఆదర్శంగా నిలిచారు. ఓ వైపు ప్రభుత్వ ఉపాధ్యాయుడిగా విధులు నిర్వహిస్తునే... మరోవైపు సామాజిక ఇతివృత్తాలతో చిత్రాలు గీస్తున్నారు. అందరి ప్రశంసలందుకుంటున్నారు తూర్పు గోదావరి జిల్లాకు చెందిన ఓ ఉపాధ్యాయుడు.

తూర్పు గోదావరి జిల్లా కోరుకొండకు చెందిన రామ్మోహనరావు చిత్రలేఖనోపాధ్యాయుడిగా పని చేస్తున్నారు. విద్యార్థులకు చిత్రలేఖనంలో మెళుకువలు నేర్పిస్తూనే... సామాజిక అంశాలపై చిత్రాలు వేస్తున్నారు. ఈయన వద్దే ఓనమాలు నేర్చుకున్న నలుగురు విద్యార్థులు 2017, 2018లో భగీరథ ఆర్ట్స్‌ ఫౌండేషన్‌ నిర్వహించిన చిత్రలేఖన పోటీల్లో బంగారు పతకాలు సాధించారు. మహానాయకుల చిత్రాలు గీయడం ఆయనకు వెన్నతో పెట్టిన విద్య. దేశ నాయకుల చిత్రాలు వేసి ప్రజాప్రతినిధులు, ఐఏఎస్ అధికారులకు బహుమతిగా అందిస్తుంటారు. పలు ప్రాంతాల్లోని కమ్యూనిటీ భవనాల్లో ఉచితంగా చిత్రాలు వేస్తున్నారు.
చిత్రలేఖనంలో వచ్చిన అవార్డులు
చిత్రలేఖనంలో ప్రతిభ చూపుతూ జాతీయస్థాయి అవార్డులను రామ్మోహనరావు అందుకున్నారు. 2018లో చోడవరం చిత్రకళాపరిషత్తు... జాతీయ అవార్డు బహుకరించింది. చిత్రలేఖన పోటీల్లో విద్యార్ధులను బంగారు పతకాల సాధించేలా చేస్తున్న ఆయనకు 2019లో జాతీయ స్థాయి ప్రత్యేక అవార్డు వరించింది. ఇదే సంవత్సరం చెన్నైలో యూత్‌ ఫెస్టివల్‌ నిర్వహించిన కార్యక్రమంలో జ్యూరీ అవార్డు అందుకున్నారు. గుంటూరులో నిర్వహించిన అమరావతి ఫెస్టివల్‌లో రాష్ట్రస్థాయి ప్రత్యేక అవార్డు అందుకున్నారు. వివిధ అకాడమీలు ఉత్తమ ఉపాధ్యాయ అవార్డుని బహూకరించారు.

ఇదీ చదవండి:నేడు గురుపూజోత్సం..ఉపాధ్యాయులకు ప్రభుత్వ సన్మానం