Todays Temperatures:వాయువ్య భారత్ నుంచి వీస్తున్న ఉష్ణగాలులతో రాష్ట్రం నిప్పుల కొలిమిలా మారింది. కోస్తాంధ్ర రాయలసీమ జిల్లాల్లో తీవ్ర స్థాయి ఉష్ణోగ్రతలు నమోదు అవుతున్నాయి. ధవళేశ్వరంలో అత్యధికంగా 46.8 డిగ్రీల ఉష్ణోగ్రత నమోదవగా.. రాష్ట్రంలోని పలు ప్రాంతాల్లో 46 డిగ్రీలకు పైగా ఉష్ణోగ్రతలు నమోదయ్యాయి. ఈ ఎండలకు ప్రజలు బయటకు రావాలంటేనే భయపడిపోతున్నారు. ఉదయం 10 గంటల నుంచి సాయంత్రం 4 గంటల వరకు రోడ్లన్నీ నిర్మానుష్యంగా మారుతున్నాయి.
రాష్ట్ర వ్యాప్తంగా వివిధ జిల్లాల్లో ఉష్ణోగ్రతలు:
- ధవళేశ్వరం 46.8 డిగ్రీలు
- ప్రకాశం జిల్లా గుండ్లపల్లి 46.7 డిగ్రీలు
- శ్రీకాకుళం జిల్లా కొత్తూరులో 46.5 డిగ్రీలు
- బాపట్ల జిల్లా అమృతలూరులో 46.4 డిగ్రీలు
- కోనసీమ జిల్లా మండపేటలో 46.3 డిగ్రీలు
- గుంటూరు జిల్లా తాడికొండలో 46.3 డిగ్రీలు
- కాకినాడ జిల్లా సీతంపేటలో 46.2 డిగ్రీలు
- కృష్ణా జిల్లా కోడూరులో 46.2 డిగ్రీలు
- ఏలూరు జిల్లా ఏదులగూడెంలో 46 డిగ్రీలు
- ఎన్టీఆర్‌ జిల్లా పుట్రేలలో 45.9 డిగ్రీలు
- నెల్లూరు జిల్లా పెద్దారెడ్డిపల్లెలో 45.9 డిగ్రీలు
- పల్నాడు జిల్లా విజయపురిలో 45.8 డిగ్రీలు
- పార్వతీపురం జిల్లా కురుపాంలో 45.4 డిగ్రీలు
- తిరుపతి జిల్లా సత్యవేడులో 45.4 డిగ్రీలు
- నంద్యాల జిల్లా పాములపాడులో 45.2 డిగ్రీలు
- విజయనగరం జిల్లా గొల్లపాడులో 45.1 డిగ్రీలు
- ప.గో. జిల్లా తణుకులో 45.1 డిగ్రీలు
- అల్లూరి జిల్లా నువ్వుమామిడిలో 45 డిగ్రీలు
- అనకాపల్లి జిల్లా మాడుగులలో 45 డిగ్రీలు
నిర్మానుష్యంగా రోడ్లు: విజయవాడలో ఎండలు మండుతున్నాయి. ఉదయం ఎనిమిది గంటల నుంచే సూర్యుడు తన ప్రతాపాన్ని చూపిస్తున్నాడు. ఎండకు భయపడి అత్యవసర పనులకు మాత్రమే ప్రజలు బయటకు వస్తున్నారు. ఇంటి వద్దనున్న వారి సైతం ఎండ తీవ్రత, వేడి గాలులకు అవస్థలు పడుతున్నారు. ఏదైనా ముఖ్యమైన పనులు ఉంటే తప్ప బయటకు రావడం లేదు. ఉష్ణోగ్రతలు ఒక్కోరోజు ఒక్కో స్థాయిలో నమోదవుతున్నాయి. నగరంలో గత రెండు రోజులుగా సుమారు 46 డిగ్రీల ఉష్ణోగ్రతలు నమోదవుతున్నాయి. రోడ్లకి ఇరవువైపులా చెట్లు లేకపోవడంతో ఎండ తీవ్రత నుంచి ఉపశమనం పొందడానికి అవకాశం లేదని ప్రజలు చెబుతున్నారు. విజయవాడ నగర పాలక సంస్థ అధికారులు ఎండ తీవ్రత దృష్ట్యా మరిన్ని చలివేంద్రాలు ఏర్పాటు చేయాలని నగరవాసులు కోరుతున్నారు. ఎండ తీవ్రతను తట్టుకోలేక శీతలపానీయాలు అధిక మొత్తంలో ప్రజలు తాగుతున్నారు. నగరంలోని ప్రధాన కూడళ్లు, బస్ స్టాప్ల వద్ద చలివేంద్రాలు ఏర్పాటు చేయాలని ప్రజలు ప్రభుత్వ అధికారులను కోరుతున్నారు.