మతిస్థిమితం కోల్పోయిన వ్యక్తిని ఆదరించిన పోలీసులు తూర్పుగోదావరి జిల్లా జగ్గంపేటలో మతిస్థిమితం లేకుండా తిరుగుతున్న ఓ వ్యక్తిని గుర్తించిన స్థానిక సీఐ వై.రాంబాబు, ఎస్ఐ టి.రామకృష్ణ అతని స్థితిగతులను మార్చేశారు. సర్కిల్ ఆఫీస్ వద్దకు తీసుకొచ్చి కటింగ్, షేవింగ్ చేయించారు. స్వయంగా సీఐ, ఎస్ఐలు స్నానం చేయించారు. అనంతరం అతడికి నూతన వస్త్రాలను అందజేసి, కడుపునిండా భోజనం పెట్టారు.
ఎక్కడి నుంచి వచ్చావు..? నీ పేరు ఏంటి..? అని సీఐ రాంబాబు అడగ్గా... హర్యానా రాష్ట్రంలోని నుత్యాన్న అని, తన పేరు శంకర్ దాస్ అని సమాధానమిచ్చాడు. అనంతరం అతనిని జగ్గంపేట హైవే మొబైల్ వాహనంలో ఎక్కించి పట్టణ శివారులోని హర్యానా దాబా హోటల్ వద్దకు పంపించారు. అక్కడ హోటల్ నిర్వాహకులు అతని భాషలో మాట్లాడి వివరాలు తెలుసుకోవాలని సిబ్బందికి ఆదేశించారు. అతని స్వగ్రామం వెళ్లేందుకు ఏర్పాట్లు చేయాలని సూచించారు.
