ప్రభుత్వ నిర్ణయాలతో ప్రశ్నార్థకంగా మత్స్యకారుల భవితవ్యం: నాదెండ్ల

ప్రభుత్వ అనాలోచిత నిర్ణయాల వల్ల ఎంతో మంది మత్స్యకారులు జీవనోపాధి కోల్పోయే పరిస్థితి ఏర్పడిందని జనసేన పార్టీ పీఏసీ ఛైర్మన్ నాదెండ్ల మనోహర్ అన్నారు. మత్స్యకారులకు భరోసా బీమా పథకాలు కూడా అందటం లేదని అన్నారు.

రాష్ట్రంలో ఎక్కడ చూసినా సమస్యలే దర్శనమిస్తున్నాయని.. వాటిని ప్రభుత్వం కనీసం పట్టించుకోకపోవటం దారుణమని జనసేన పార్టీ పీఏసీ ఛైర్మన్ నాదెండ్ల మనోహర్ అన్నారు. తూర్పుగోదావరి జిల్లా ఈతకోటలో పర్యటించిన ఆయన.. కొత్తపేట నియోజకవర్గ నేతలతో సమావేశమయ్యారు. ఈ సందర్భంగా నియోజకవర్గానికి చెందిన పలువురు వైకాపా, తెదేపా కార్యకర్తలు జనసేనలో చేరారు. వారికి నాదెండ్ల మనోహర్ కండువాలు కప్పి పార్టీలోకి ఆహ్వానించారు.

ప్రభుత్వ అనాలోచిత నిర్ణయాల వల్ల ఎంతో మంది మత్స్యకారులు జీవనోపాధి కోల్పోయే పరిస్థితి ఏర్పడిందన్నారు. 217 జీవోతో 2500 మత్స్యకార సంఘాలు నిర్వీర్యం అవుతాయన్నారు. మత్స్యకారులకు భరోసా బీమా పథకాలు కూడా అందటం లేదని అన్నారు. పార్టీ అధినేత పవన్ కళ్యాణ్ ఆదేశాల మేరకు మత్స్యకార ప్రాంతాలను సందర్శిస్తున్నామని.., సమస్యలపై పవన్​కు నివేదిక అందిస్తామన్నారు.

ఇసుక మాఫియా భరతం పడతాం..
ఇసుక మాఫియాపై ప్రజల పక్షాన ఉండి జనసేన పోరాడుతుందని నాదెండ్ల మనోహర్ వెల్లడించారు. ఎర్రంశెట్టివారి పాలెం గ్రామాన్ని ఆయన సందర్శించగా.. గ్రామాన్ని ఆనుకుని ఉన్న వంతెనపై నుంచి ఇసుక అక్రమ రవాణా జరగటం వల్ల వంతెన బలహీన పడుతుందని గ్రామస్థులు నాదెండ్ల దృష్టికి తీసుకువచ్చారు. ఇసుక మాఫియా పనిపట్టేందుకు జనసేన ముందుండి పోరాడుతుందని వారికి భరోసా ఇచ్చారు.

వారికి ఆలయ మర్యాదలు దక్కటం లేదు..
అంతకు ముందు నాదెండ్ల మనోహర్ అంతర్వేది లక్ష్మీ నరసింహస్వామివారిని దర్శించుకున్నారు. అర్చకులచే వేదాశీర్వచనం పొంది స్వామి వారి తీర్థప్రసాదాలు స్వీకరించారు. ఈ సందర్భంగా మాట్లాడిన ఆయన..స్థానిక అగ్నికులక్షత్రియులైన మత్స్యకారుల ఆరాధ్యదైవమైన స్వామివారి ఆలయంలో వారికి అందవలసిన మర్యాదలు అందటం లేదన్నారు. స్వామివారి రథం దగ్ధమై ఏడాదిన్నర గడిచినా ఇప్పటి వరకు దోషులను పట్టుకోలేదన్నారు. రాష్ట్రంలో మత్స్యకారులు దుర్భరమైన జీవితం గడుపుతున్నారని.., వారికి ప్రభుత్వం ఇవ్వవలసిన రాయితీ పథకాలు, బీమా ఇవ్వటం లేదని విమర్శించారు. ప్రభుత్వ వైఖరికి నిరసనగా ఈనెల 20న నరసాపురంలో పవన్ కల్యాణ్ సభ నిర్వహిస్తున్నామని.. సభను విజయమతం చేయాలని పార్టీ కార్యకర్తలకు పిలుపునిచ్చారు.

ఇదీ చదవండి